Dili, 06 Maiu 2024 (SRP), Ministru Interior Francisco da Costa Guterres P.hD, akompaña husi Sekretáriu Estadu Protesaun Sivíl, Domingos Mariano afirma katak fulan ne’e nia laran Ministériu Interior sei halo restruturasaun ba kargu xefia sira iha diresaun tomak.
“Atu informa ba imi hotu fulan ida-ne’e nia laran ita halo restruturasaun tomak iha Ministériu Interior, mudansa ba diretór jerais, diretór nasaionál sira, Xefe departementu, xefe seksoens, koko fali ba ema seluk halo servisu iha munisípiu sira hotu hanesan Protesaun Sivíl, Migrasaun, no diresaun tutela sira ne’ebe mak servisu la diak, o la serve atu komanda tau fali ema seluk ” Ministru Interior Francisco da Costa Guterres, tatoli mensajen ne’e liu hosi seremónia isar bandeira nasionál semana dahuluk, iha Ministériu Interior Vila verde Dili, segunda feira ohin.
Governante ne’e informa, mudansa ba restruturasaun ne’e sei hahú uluk ba iha seguransa sivíl sira no mós Prevensaun Konflitus tanba ita hakarak ezije malu atu servisu se lae ita desorganizadu.
“Ha’u husu ba imi hotu funsionáriu kargu xefia sira tenke dezenvolve aan hodi halo buat ruma, labele mai no la halo buat ruma, tuur deit iha ne’eba karik servisu la iha aperende, no tenke iha targetu, tenke iha vizaun, funsionáriu hotu tenke hatene nia papel” nia hakotu.
Funsaun ho natureza funsionáriu tenke aplika téknika ho baze iha koñesimentu ka adaptasaun ba métodus no prosesu sira, ne’ebé defini didiak iha diretiva sira, eziji koñesimentu tékniku, teóriku no prátiku sira. Funsionáriu públika obrigadu atu hala’o ninia funsaun ba fatin ne’ebé hatudu ba, iha ezersísiu ba funsaun sira. Funsionáriu públiku sira tenke servisu tuir prinsípiu deskrisaun, konfidensialidade, imparsialidade, onestidade, integridade no igualdade. # Ekipa SRP.
