Dili, 29 marsu 2024 (SRP) – Polísia Nasionál Timor-Leste (PNTL), liuhosi Servisu Informasaun Polísia Nasionál (SIPN) junta ho Servisu Informasaun Militar (SIM), asegura joven mane nain 5 ne’ebé envolve krime jerál ba kazu naok motór iha Kapitál Dili.
Ekipa konjunta kaptura uluk suspeitu JTS alias ON iha area Bedois, hodi kontinua foti tan AES alias OG hamutuk ho JCMF alias AF iha area Matadouru ne’ebé sai mós hanesan sasin prinsipál tanba motorizada hirak ne’e para iha nia uma no ikus mai kaptura suspeitu prinsipál ho naran AJ alias AMB iha area Manumeta Rai Hun inklui PCR alias AS iha area Aituri Laran tanba sa’e hela motór naok.
Rekorda fali katak, antes ne’e suspeitu AES komete ona kazu sobu kiosque, naok ropa iha loja inklui naok ema nia animál ne’ebe nia inan rasik selu hotu ona. Enkuantu suspeitu AJ alias AMB komete ona kazu naok osan, naok motór, naok telfone no-mós hadau telfone iha dalan publiku ne’ebé mak rejista ona iha baze de dadus PNTL nian.
Entretantu evidénsia ne’ebé ekipa rekolla iha motorizada hamutuk 7 inklui telefone hamutuk 3 maka hanesan tuir mai ho espesifikasaun hanesan, Honda Beat kor metan ne’ebé sira pinta fali ba mutin azul, númeru chasis : MH1JM9125PK796038, Honda Beat Karbu sira pinta ba kor mean metan, númeru chasis : MH1JF5116AK126564, Beat kor metan númeru chasis MH1JM8127NK252793, Beat Street kor mutin metan, númeru chasis : MH1JFZ210JK376923, Beat Predatór kor metan, númeru chasis : MH1JM9124PK838442, Beat Space kor metan númeru chasis : MH1JFA111DK176690, Beat Predatór kor metan, númeru chasis: JM91E3043222, telefone marka REALME, kor roixu, OPPO 5S kor azul no I-phone XR kor metan.
Hafoin remata prosesu identifikasaun ekipa servisu halo kedas auto entrega suspeitu nain 2 hamutuk ho evidénsia ba Departamentu Investigasaun Kriminál Nasionál (DIKN), hodi halo prosesu investigasaun.
