Manufahi-03 outubru 2023 (SRP) –Ministériu Interior liuhusi Diresaun Nasionál Prevensaun Konflitu Komunitáriu (DNPKK) hasa’e koñesimentu autoridade lokál, lideransa komunitária, autoridade seguransa no komunidade sira iha postu Administrativu ALAS suco DOTIK, ligadu ho Planu Asaun Nasionál (PAN-1325) kona-ba Feto, Pás no Seguransa.
Iha abertura, reprezentante Diretór DNPKK, Julião Fernandes hateten objetivu desiminasaun PAN 1325 kona-ba Feto, Pás no Seguransa importante hodi hasa’e koñesimentu komunidade, no komitementu governu nian ba implementasaun PAN 1325 iha Timor-Leste, hodi rekoñese feto sira-nia luta ba ukun rasik aan.
“Fó motivasaun no korajen nafatin ba inan feton sira no ba joven feto sira tanba ita boot sira-nia papel sei investe iha paz no estabilidade. Ho ida-ne’e rezolusaun konsellu seguransa nasoens unidas fó oportunidade atu rekoñese fila fali feto sira ne’ebé maka sai hanesan liña de fogo, primeira liña kontra invajór sira, apoiu mane sira, feto sira mós sai vítima ba violénsia no torturasaun ne’ebé maka ita-nia rain hasoru iha tempu pasadu hahú husi tinan 1975-1999, Razaun ida-ne’e maka mosu planu asaun nasionál 1325 hodi koresponde ba rezolusaun konsellu seguransa nasoens unidas,” reprezentante diretór DNPKK nee akresenta.
Iha sorin seluk, reprezentante Administradór Postu Administrativu Alas, Sabino Amaral Seac, agradese ba ekipa DNPKK ne’ebé ho laran luak mai halo desiminasaun hodi bele transforma hanoin no partisipasaun liuhusi dever no direitu fundamentál sira.
“ohin loron ita iha ne’e mai atu hatutan, onra ita-nia eroi sira, tamba husi sira-nia sakrifiu maka ohin loron ita hotu hamutuk iha ne’e, agradese no kontente ho desiminasaun ida-ne’e hodi koalia kona-ba Rezolusaun Konsellu Seguransa 1325-Feto Paz no Seguransa iha suku Dotik. Iha biban ne’e autoridade lokál ne’e enkoraja feto sira labele tauk atu partisipa iha dezenvolviemntu, hau fiar katak husi desiminasaun ida-ne’e bele transforma ita hotu nia hanoin ba partisipasaun hotu, maibé tenki hatene ita-nia devér no direitu sira,”.
Atividade desiminasaun ne’e konta ho prezensa husi partisipantes 70 kompostu hosi OPS, Xefe Suku, Xefe Aldeia, Delegadu, Komunidade inklui juventude sira.# Cris.
