DNAF APREZENTA PROPOSTA ORSAMENTU RETIFIKATIVU MINISTÉRIU NIAN BA MI

Díli, 15 jullu 2023 – Ministru Interior (MI), Francisco da Costa Guterres, Ph.D, akompaña husi Sekretáriu Estadu Protesaun Sivíl (SEPS), Domingos Mariano Reis, hala’o enkontru ho diresaun no kargu xefia ne’ebé responavel ba Administrasaun no Finansas tutela Ministériu Interior hodi partilla prosesu preparasaun Orsamentu Retifikativu (OR).

Objetivu hosi reuniaun ne’e hodi halo preparasaun Orsamentu Retifikativu no Orsamentu Jerál Estadu (OJE) 2024, tanba iha tempu badak IX Governu sei aprezenta ba Parlamentu Nasionál.

Iha enkontru ne’e, Ministru Interior mós husu kada diresaun tutela atu haree didi’ak planu hirak ne’e tuir regra Orsamentál ne’ebé iha, liuliu kada diresaun ida-idak bele prepara planu Orsamentu Retifikativu no OJE 2024 ne’ebé di’ak tuir Programa Polítika IX Governu Konstitusionál ne’ebé hatuur ona iha planu prioridade Ministériu Interior nian.

Iha enkontru ne’ebé envolve mós parte PNTL, Servisu Migrasaun no Protesaun Sivil atu halo diskusaun internál ne’ebé foka liubá planu Orsamentu Retifikativu hodi haree programa esensiál sira ne’ebé bele realiza iha loron 120 no mós Planu OJE 2024 ba sustenta implementasaun programa prioritária sira ba tinan ida.

Enkontru ne’ebé hala’o iha loron rua nia laran entre sábadu no Domingu ne’e envolve Komandante Jerál PNTL, Komisáriu Jerál Polísia Henrique da Costa, Segundu Komandante Jerál PNTL, Komisáriu Pedro Belo, Diretór Jerál Administrasaun Finansas, Mariano de Araujo inklui pontu fokál finansas hosi Ministériu Interior. #Bui