Díli, 28 jullu 2023 (SRP) – Iha loron sesta feira, Prezidente Komisaun B Parlamentu Nasionál (PN), Domingos Augusto”Deker”, hamutuk ho deputadu sira hosi Komisaun B ne’ebé trata asuntu Defeza, Relasaun Externa no Seguransa Nasionál, halo vizita servisu hodi hasoru malu ho Diretora Jerál Servisu Migrasaun Inspetora Xefi Polísia Adelaide da Rosa, hodi observa no rona direitamente progresu servisu no dezafiu sira ne’ebé maka hasoru iha servisu loron- loron.
Iha sorumutuk ne’e deputadu sira rona rasik aprezentasaun relatóriu kona-ba dezenvolvimentu servisu ne’ebé maka halo ona, inklui dezafiu no planu prioridade ne’ebé maka atu halo iha tempu badak nia laran inklui totál reseitas estadu nian ne’ebé mak Diresaun Jerál Migrasaun rekolla liu husi emisaun vistu, extensaun vistu no-mos koima sira.
Enkontru ne’ebé hala’o iha sala Migrsaun Ministériu Interior, Vila-Verde ne’e, envolve mós Adjuntu Diretór Jerál, Xefi Sektór sira, Xefi Gabinete DGSM, Divizaun Adidu Divizaun CPPM no finansas. #Elisa
