Díli, 15 marsu 2024, Ministru Interior, Francisco da Costa Guterres, Ph.D, akompaña hosi Sekretáriu Estadu Asuntu Toponímia no Organizasaun Urbana (SEATOU), Germano Santa Brites no Komandante Komandu Operasaun Superintendente Xefi Polísia, Jose Soares, hala’o enkontru ho Vise-Primeiru Ministru, Ministru Koordenadór bá Asuntu Ekonómiku, Ministru Turizmu no Ambiente, Francisco Kalbuadi Lay, hodi halo kooperasaun servisu ida ne’ebé diak ho nain ba kompañia sira atu minimiza jogus illegál ne’ebé oras ne’e lao makas iha kapitál Dili.
Desde inisiu fulan fevereiru atividade jogu bola guling agora loke iha fatin-fatin hanesan area Tasi-Tolu, Comoro, Bairo-Pite, Motael, Culuhun, Caikoli no Becora ne’e okupa tebes espasu públiku ba asesu komunidade sira nian no fó impaktu negativu ba mentalidade labarik ho idade kiik sira ne’ebé fasil asesu.
Nune’e, bazeia ba rezolusaun no dekretu Lei Servisu Komunitariu, Guvernu la autoriza sidadaun atu loke atividade jogu bola guling iha espasu publiku wainhira laiha autorizasaun hosi Prezidente Autoridade Munisípiu sira. Sidadaun sira ne’ebé agora daudaun loke hela atividade bola guling sei hapara tanba Guvernu sei sentraliza jogus hotu no kria sistema modernu ida hodi dijitaliza bola guling inklui lotaria sira atu nune’e labele prejudika ba labarik kiik no minimiza jogus illegál sira.
Enkontru ne’e hetan partisipasaun hosi, Diretór Jerál Seguransa Prevensaun Konflitu, Gaspar de Sousa, Diretór Nasionál DNSPP, Januario Barreto, Komandante Komandu PNTL Munisípiu Dili, Superintendente Xefi Polísia Orlando Gomes, Xefi Departementu Investigasaun Kriminál Nasionál (DIKN), Superintendente Polísia, João Belo dos Reis, Diretór Jerál Jogos no-mos asesór jurídiku sira. # (Rival/Oser/AX).
