𝐌𝐈: 𝐉𝐄𝐒𝐓𝐀𝐔𝐍 𝐃𝐈𝐉𝐈𝐓𝐀́𝐋 𝐈𝐌𝐏𝐎𝐑𝐓𝐀𝐍𝐓𝐄 𝐁𝐀 𝐒𝐄𝐆𝐔𝐑𝐀𝐍𝐒𝐀 𝐍𝐎 𝐌𝐈𝐆𝐑𝐀𝐒𝐀𝐔𝐍 𝐌𝐎𝐃𝐄𝐑𝐍𝐔

Lianyungang, 21 Setembru 2026 — Ministru Interiór, Francisco da Costa Guterres, Ph.D, hato’o, diskursu iha Forum Globál kona-ba Seguransa Públika, ho tema “Servisu no Jestaun Dijitál no Inteligente ba Nasionál Estranjeiru sira”, ne’ebé hala’o iha Lianyungang China,(09/09/2026).

Iha nia diskursu, Ministru Interiór hateten katak Governu presiza uza teknolojia atu proteje soberania nasionál husi ameasa sira hanesan falsifikasaun dokumentu, liu prazu visa no krime transnasionál. Tanba ne’e Timor-Leste presiza nafatin moderniza sistema Migrasaun liuhusi servisu no jestaun dijitál ne’ebé inteligente, seguru no transparente.

Iha pozisaun estratéjika iha movimentu rejionál iha tempu hanesan, Timor-Leste sei nafatin fasilita turista, estudante no traballadór sira ne’ebé kontribui ba kresimentu ekonómiku no dezenvolvimentu nasional.

Governante mós subliña katak, jestaun ba nasionál estranjeiru sira la’ós de’it asuntu seguransa, maibé mós sai prioridade dezenvolvimentu. Tanba ne’e, Timor-Leste bazeia ba pilar haat, mak kontrolu, servisu, fasilitasaun no konfiansa.

“Kontrolu sei hala’o liuhusi lei ne’ebé klaru, fronteira seguru no monitorizasaun dijitál. Servisu sei hadi’a liuhusi plataforma visa no imigrasaun ne’ebé asesível no transparente. Fasilitasaun sei fó atensaun ba prosesu sira ne’ebé simplifikadu ba servisu, estudu no investimentu. Enkuantu konfiansa sei harii liuhusi tratamentu justu, protesaun dadus pesoál no diálogu nakloke ho komunidade no nasionál estranjeiru sira“.

Ministru Interiór mós hateten katak Timor-Leste enfrenta dezafiu bo’ot sira, liuliu liu prazu visa no falsifikasaun dokumentu. Atu responde ba dezafiu hirak-ne’e, Servisu Migrasaun hametin monitorizasaun kona-ba  implementasaun verifikasaun dijitál.

Tuir nia esplikasaun, Timor-Leste hakarak harii sistema migrasaun integrada no inteligente ne’ebé bazeia ba jestaun inteligente no kooperasaun rejionál. Governu planeia atu liga planu sira iha aeroportu, portu marítimu no fronteira terrestre — ba baze-dadus nasionál sentrál ida.

Sistema ne’e sei uza teknolojia hanesan biometria, rekonesimentu oin no análize risku atu deteta ameasa sira sedu. Iha parte seluk, viajante sira ne’ebé konsidera risku ki’ik sei bele hetan prosesu ne’ebé lalais liután, enkuantu ofisiál migrasaun sei hetan ekipamentu di’ak atu foti desizaun.

Iha área kooperasaun rejionál, Timor-Leste reafirma kompromisu atu fahe informasaun no prátika di’ak sira ho nasaun parseira, ho objetivu atu kombate krime transnasionál no hadi’a jestaun fronteira.

“Laiha nasaun ida mak bele jere migrasaun no seguransa mesak,” dehan Ministru Interiór, hodi enfatiza importánsia kooperasaun entre nasaun sira.

Iha nia konkluzaun, Governnante reafirma kompromisu Timor-Leste atu moderniza sistema Migrasaun, servisu ba ema hotu ho dignidade, proteje soberania nasional no apoia kresimentu inkluzivu.

#creditfoto_Mey