𝐏𝐍𝐓𝐋 𝐍𝐎 𝐃𝐍𝐒𝐑 𝐒𝐄𝐍𝐒𝐈𝐁𝐈𝐋𝐈𝐙𝐀 𝐊𝐎𝐃𝐈𝐆𝐔 𝐄𝐒𝐓𝐑𝐀𝐃𝐀 𝐈𝐇𝐀 𝐄𝐒𝐆 1912 𝐌𝐀𝐍𝐔𝐅𝐀𝐇𝐈 

𝐒𝐀𝐌𝐄, 01 𝐣𝐮ñ𝐮 𝟐𝟎𝟐𝟔 𝐒𝐑𝐏) – Ministeriu Interior, liu hosi Diresaun Nasionál Seguransa Rodoviaria (DNSR), kontinua hala’o sensiblizasaun kona-ba Prevensaun Seguransa Rodoviaria, ba estudante Eskola Sekundária Jerál 1912 Manufahi iha Postu-Administrativu Same Villa, Munisipiu Manufahi.

Diretor Nasional ba Diresaun Nasional Seguransa Rodoviaria, Elder Soares, hateten sensibilizasaun ida ne’e importante tebes tanba estudantes sira ne’e maka sei sai jerasaun kontinuador ba nasaun ida ne’e.

“Ami hosi Diresaun Nasionál Seguransa Rodoviaria koordena ho Diresaun Nasionál Transparente Terrestre (DNTT) no-mos PNTL, ohin ami mai halo sensibilizasaun iha ESG 1912 Manufahi para muda sira nia mentalidade, tanba sira ne’e joventude ne’ebe sei sai heroi ba nasun ida ne’e. Entaun objetivu prinsipal maka sira bele iha pasensia no konsiensia wainhira uza Estrada ho diak”, esplika Elder, ba jornalista sira iha resintu ESG 1912 Manufahi, (30/05/2026).

Nia dehan, importansia hosi atividade ne’e maka atu prevene no habelar liutan materia Seguransa Rodoviaria ba estudante sira hodi hadok an hosi risku asidente grave.

“Seguransa rodoviária la’ós de’it kona-ba veíkulu sira, maibé mos ba ema lao ain no infraestruturas Estrada. Durante ne’e ita observa katak maioria motorista sira ne’ebe uza transporte publiku ho idade ne’ebe sei kik no balu kontinua viola sinais ne’ebe monta iha estrada. Atu dehan deit katak sinais ne’ebe Guvernu monta iha estrada ne’e reprezenta ona polisia tranzitu”, fundamenta.

Tuir Elder, materia sira ne’ebe fo ne’e iha kontekstu rua ida maka liga ba politika seguransa rodoviaria nian no ida seluk maka kodigu Estrada.

Iha fatin hanesan, Xefi Seksaun Tranzitu Munisipiu Manufahi, Inspetor Polisia, Valerio Branco, hateten sensibilizasaun ne’e atu estudante sira bele iha kuñesementu klean wainhira halo sirkulasaun iha Estrada publika nune’e sira bele respeita sira nia an, ema seluk no-mos sinais ne’ebe maka iha.

“Ohin hau mai fahe informasaun kona-ba oinsa atu uza estrada publiku ho seguru, respeita sinais tranzitu no aplikasaun koimas ba infrator sira. Iha Manufahi barak liu maka la iha karta kondusaun, lori motor la uza kapasete ne’e as tebes. Agora liga ba sinais tranzitu barak maka seidauk komprende diak, entaun ita aproveita tempu para fahe informasaun ba sira atu hatene diak liutan”, haktuir Valerio.

Nia informa, tinan kotuk Komandu Polisia Nasionál Timor-Leste Munisípiu Manufahi hatama ona reseitas ba kofre estadu ho montante ne’ebe bot.

“Agora kona-ba infrasaun nian iha fulan janeiru 2026 to’o mai to agora ita rejista hamutuk 59,  iha mos asidente hamutuk 11, kompostu hosi asidente 9 normal no asidente fatal hamutuk 2. Agora kona-ba koima nian Komandu Polisia Nasionál Timor-Leste Munisípiu Manufahi hatama ona reseitas ba kofre estadu hamutuk 5 mil”, relata.

Nia dehan koima sira ne’e mai husi motorista sira ne’ebe viola kodigu Estrada tanba la iha karta kondusaun no kontra regras sinais tránzitu. #AX