𝐃𝐢𝐥𝐢, 𝟎𝟐 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔 (𝐒𝐑𝐏) – Ministru Interior, Francisco da Costa Guterres, Ph.D akompaña husi Sekretariu Estadu Protesaun Sivil, Domingos Mariano Reis, no Prezidente Autoridade Protesaun Sivil, Jesuino dos Reis de Matos Carvalho, L.AP, halo enkontru ho Diretór Ezekutivu Sentru Koordenasaun Asisténsia Umanitária ASEAN (AHA), Lee Yam Ming, iha sala enkontru Servisu Migrasaun.
Iha enkontru ne’e, Diretór Ezekutivu Lee Yam Ming hateten, Sentru Koordenadór ASEAN ba Asisténsia Umanitária kona-ba jestaun dezastre (Sentru AHA) aprezenta komprimentu ba Ministru Interior, Sekretariu Estadu Protesaun Sivil, no Prezidente Autoridade Protesaun Sivil Timor-Leste, sente onra ba vizita ofisiál mai iha Dili durante loron tolu hahú husi 2 to’o 4 Fevereiru 2026.
Durante vizita ne’e Sentru AHA propoin, ba Prezidente APC, kona-ba envolvimentu ne’e sei fornese oportunidade ida ne’ebé iha valór atu hametin kooperasaun no troka opiniaun, partikularmente haree ba estatutu Timor-Leste nian nu’udar membru foun ba ASEAN no APC nia papél nu’udar membru Konsellu Administrasaun Sentru AHA nian.
Sentru AHA fiar katak vizita no enkontru sei hasa’e liu tán komprensaun mútua hodi hametin kolaborasaun institusionál, no apoiu integrasaun Timor-Leste iha mekanizmu jestaun dezastre rejionál no asisténsia umanitária ASEAN nian.
Sentru koordenasaun asisténsia umanitária ASEAN (AHA) hanesan organizasaun intergovernamentál ida ne’ebé hari’i husi estadu membru ASEAN hodi fasilita kooperasaun no koordenasaun kona-ba jestaun dezastre entre estadu membru ASEAN no-mos organizasaun internasional seluk hodi lidera resposta ba dezastre ne’ebe lalais no efetivu iha rejiaun Aziatiku.
Sentru AHA hala’o papél krusiál ida servisu hanesan sentru koordenasaun primáriu ba asisténsia umanitária durante dezastre sira iha ASEAN, tane a’as espíritu ASEAN ida, resposta ida.
Mitigasaun no Preparasaun, hamenus lakon potensiál ba vida no propriedade liu husi identifikasaun risku, monitorizasaun perigu, no hadi’a alerta antesipada.
Diretór Ezekutivu Lee Yam Ming hateten, tanba ne’e kooperasaun ho Autoridade Protesaun Sivil (APC) liu husi kolaborasaun rejionál, hametin kapasidade nasaun sira ASEAN nian hodi koletivamente jere dezastre sira.
Koordenasaun resposta lalais sai hanesan forsa motriz prinsipál ba resposta emerjénsia dezastre nian iha área ASEAN, liu husi implementasaun akordu ASEAN kona-ba Jestaun Dezastre no Resposta Emerjénsia (AADMER).
Iha enkontru ne’e Diretor Ezekutivu Lee Yam Ming, afirma liu hanesan hasa’e kapasidade, haforsa lideransa administrasaun dezastre iha ASEAN liu husi formasaun no dezenvolvimentu kapasidade, hanesan ACE-LEDMP (Sentru ASEAN ba edukasaun kona-ba programa lideransa iha jestaun dezastre).
Iha enkontru ne’e Diretor Ezekutivu Lee Yam Ming, akompaña husi, Vise Diretór Ezekutivu Krishna Putra Tanaja, Asistente Diretór Preparedness & Response Agustina Tnunay, Asistente Diretór Estrategic Planning, Monitoring & Partnerships Abdul Aleem Siddiq, no Disaster Monitoring & Analysis Officer, Sadhu Zukhruf Jonattama. #SRP
