𝐌𝐈 𝐀𝐋𝐄𝐑𝐓𝐀 𝐁𝐀 𝐃𝐍𝐏𝐊𝐊 𝐍𝐎 𝐀𝐏𝐂 𝐇𝐀𝐋𝐎 𝐉𝐄𝐒𝐓𝐀𝐔𝐍 𝐑𝐄𝐃𝐔𝐒𝐀𝐔𝐍 𝐑𝐈𝐒𝐊𝐔 𝐁𝐀 𝐃𝐄𝐙𝐀𝐒𝐓𝐑𝐄 𝐍𝐎 𝐊𝐎𝐍𝐅𝐋𝐈𝐓𝐔

Same, 22 fevereiru 2025 (SRP) – Ministru Interiór, Francisco da Costa Gutteres Ph.D, hamutuk ho Prezidente Autoridade Protesaun Sivil (APC;sigla portuges), Jesuíno dos Reis Matos Carvalho, halo enkontru ho estrutura tomak APC, DNSPP no Diresaun Nasional Prevensaun Konflitu Komunitária (DNPKK) Munisípiu Manufahi nian, hodi avalia no identifika planu prioridade hirak ne’ebe sei implementa iha tinan ida ne’e nia laran.

Ministru Interior hateten, DNPKK no Protesaun Sivil eziste hodi servi povu prevene konflitu no risku dezastre ba asidente grave no katastrofes ne’ebe mosu iha Timor-Leste.

“Ita bot sira iha ne’e halo knar importante ida hodi fo apaoiu ba komunidade halo prevensaun, no ajuda komunidade sira ne’ebe sai vitima wainhira mosu dezastre naturais iha rai ida ne’e. Hanesan ita hotu hatene, DNPKK mosu iha tinan 2008 ita envolve joven, autoridade lokal no veteranu sira iha laran atu rezolve problema kik oan sira iha komunidade nia let. Agora protesaun sivil ne’e mosu hodi bele halo servisu kordenada atu fo apoiu ba dezastre ne’ebe mosu iha komunidade nia let”, esplika Ministru Interior, Francisco durante enkontru ne’e iha edifisiu APC Manufahi, sexta (21/02/2025).

Nia dehan, estadu kontinua institusionaliza DNPKK no servisu protesaun sivil hodi sai instituisaun ida forte, atu tau matan no proteje komunidade husi konflitu no vitima dezastre naturais.

“Ida-Ida hatene nia servisu, dedika an atu serve tanba guvernu fo fiar ba imi atu tau matan ba komunidade, tanba ne’e hau husu medidor no pontu fokal konflitu sira halo kooperasaun ho autoridade lokal, OPS, Konsellu Suku atu kontinua halo diagnostiku ba kazu ne’ebe mosu iha komunidade nia let to’o hetan solusaun final. Agora ba protesaun sivil atu serve povu ho dignu hosi ameasa dezastre. Halo jestaun redusaun risku ba dezastre hodi buka dalan fo hatete ba komunidade kona-ba impaktu risku dezastre, sosializa ba sira atu hadok an hosi area risku hodi antesipa dezastre”, fundamenta.

Iha liafuan ikus ezekutivu ne’e husu funsionariu sira atu kontinua rezolve kauza hosi konflitu sira hanesan disputa rai, violensia entre joven, kazu balada tama tos, hadau malu baliza rai nomos problema sosial familia nian ne’ebe kauza ba violensia domestika.

Entretantu, Prezidente APC, Jesuíno dos Reis Matos Carvalho, sente kontente ho vizita Ministru Interior ho ekipa mai hodi rona rasik preokupasoens ne’ebe funsionariu sira hasoru.

“Ita hotu agradese tanba ohin Ministru Interior bele mai to’o iha ne’e atu hare rasik progresu servisu no-mos ita nia preokupasaun. Ita rekuñese ekipamentu, rekursu humanu no infraestrutura sei falta maibe dever imi nian kontinua servisu hamutuk hodi atinji progresu”, esplika Jesuíno Matos.

Lideransa APC ne’e hatutan, Ministru Interior halo servisu extra ordinaria tebes hodi kontinua halo instituisaun sai boot ba bei beik, hodi halo prevensaun, mitigasaun no resposta ba situasaun emerjénsia no katástrofe oi-oin. #AX