𝐆𝐔𝐕𝐄𝐑𝐍𝐔 𝐅𝐎 𝐏𝐑𝐈𝐎𝐑𝐈𝐃𝐀𝐃𝐄 𝐁𝐀 𝐁𝐄𝐌 𝐄𝐒𝐓𝐀𝐑 𝐏𝐍𝐓𝐋 𝐇𝐎𝐓𝐔

Viqueque, 09 fevereiru 2025 (SRP) – Ministru Interiór, Francisco da Costa Guterres, Ph.D, hamutuk ho komitiva, Segundu Komandante Jeral PNTL, Komisariu Polisia Pedro Belo, hala’o vizita servisu ba Komando PNTL Munisípiu Viqueque, hodi haree besik liután kondisaun ne’ebé membru sira enfrenta.

Komandante PNTL Munisipiu Viqueque, Superintendente Polisia, Antonio Rego Fernandes, haksolok ho vizita ne’e hodi bele motiva di’ak liután nia membru sira. Inklui aprezenta mós progresu servisu no dezafius ne’ebé durante ne’e sira hasoru para oinsá rezolve problema sira ne’e.

Hatan ba preokupasaun hirak ne’e, Ministru Francisco hateten, agora daudaun Guvernu hahú halo modernizasaun ba PNTL bazeia ba planu prioridade Guvernu nian maka hadia uluk promosaun, infraestrutura tuir mai rejime salarial hodi hadia kareira no bem estar membru PNTL tomak.

Iha vizita ofisiál ne’e, membru sira hato’o sira-nia preokupasaun barak hosi Komandante Operasaun, Komandante Eskuadra no xefi seksaun sira kona-ba ekipamentu operasionál nian hahu kedas hosi transporte, kombustivel, fardamentu, radio komunikasaun, stick, aljema, makina fotokopiadora no impresora, inklui formasaun, no-mos husu atu mediku PNTL sira mai halo check up kada fulan tolu iha komandu munisipál.

Ministru Interior mós garante katak, Governu sei esforsu nafatin atu buka solusaun ba kondisaun hirak ne’ebé PNTL enfrenta liu-liu Komandu Munisipál sira. Tanba ne’e nia ho Xefi Gabinete Ministru Interior, Paul Assis Belo, Inspetor Jeral PNTL Superintendente Xefi Polisia Jorge Monteiro, Komandante Unidade Espesial Polisia, Superintendente Damião Correia no Diretores Nasionais siramai atu haree rasik situasaun reál iha ne’e.

Entretantu, preokupasaun hirak ne’ebé iha, nia parte ho segundu Komandante Jerál PNTL, aponta ona hodi nune’e bele iha planu ida ne’ebé di’ak. Tanba Guvernu no estadu iha obrigasaun kria kondisaun dignu ba forsa seguransa estadu nian.

Ho vizita ida ne’e maka termina ona vizita Mai área leste nian tanba antes ne’e halo ona vizita ofisiál ba Komandu Munisipiu Lautem, Baucau no Viqueque hodi haree situasauan jerál no kondisaun servisu iha Komandu Munisípiu no-mós eskuadra PNTL sira hodi buka hatene dezafius ne’ebé membru sira enfrenta hodi buka solusaun.