𝐀𝐔𝐒𝐓𝐑𝐀𝐋𝐈𝐀 𝐍𝐎 𝐓𝐋 𝐊𝐎𝐍𝐓𝐈𝐍𝐔𝐀 𝐏𝐑𝐎𝐌𝐎𝐕𝐄 𝐊𝐎𝐎𝐏𝐄𝐑𝐀𝐒𝐀𝐔𝐍 𝐁𝐈𝐋𝐀𝐓𝐄𝐑𝐀𝐋 𝐁𝐀 𝐄𝐒𝐓𝐀𝐁𝐈𝐋𝐈𝐃𝐀𝐃𝐄 𝐑𝐄𝐉𝐈𝐎𝐍𝐀𝐋

Dili, 27 janeiru 2025 (SRP) – Ministru Interior, Francisco da Costa Guterres, Ph.D, oferese jantar konfraternizasaun ba Ministru Interior Australia nian, Anthony Stephen Burke ho nia delegasaun, ne’ebe ohin halo vizita dahuluk mai Timor-Leste, hodi hametin liutan lasu amizade no diplomasia entre nasaun rua ne’e, iha area seguransa nian.

Iha okajiaun ne’e Ministru Interior, lori Guvernu nia naran fo bemvindu ba vizita ofisial Ministru Anthony Stephen Burke ho komitiva hodi kontinua promove estabilidade rejional no ko-operasaun bilateral ne’ebe lao kleur ona.

Entretantu Ministru Negósiu Estranjeiru no Kooperasaun, Bendito dos Santos Freitas, hateten, nasaun rua ne’e presija tebes hakarak hametin Instituisaun sira ne’ebé vokasionadu ba área hanesan dezastre naturál, operasaun apoiu ba Pás, kontra terorismu, kapasitasaun teknika no treinamentu hamutuk kuandu iha situasun sira ne’ebé mosu, ita iha kbiit atu kopera ba malu tanba mehi Timor-Leste mak hakarak konkista paz no estabilidade iha rejiaun no mundu.

Hatan ba ida ne’e, Ministru Interior Australia nian, Anthony Stephen Burke, hateten katak, Governu Australia iha komitmentu bot halo Timor-Leste sai parseiru diak nune’e amizade entre nasaun rua bele metin liutan. Ho ida ne’e Australia prontu apoia programa kapasitasaun teknika wainhira Governu Timor-Leste presija tanba iha relasaun amizade ida ne’ebe diak tebes.

Nia dehan, wainhira nia mai iha Timor hare katak Timor-Leste nia kultura forte tebes tanba ema kontinua defende no habelar nafatin kultura ne’ebe iha nanis ona. Ho ida ne’e foin daudaun vizita pastorál Papa Francisco vizita Timor-Leste hateten katak Ha’u agradese ba Na’i tanba lori ha’u mai Timor-Leste no ha’u enkoraja ninia povu atu moris ksolok fiar nian, iha armonia no diálogu ho kultura”.

Antes termina, Ministru Anthony Burke, reafirma nia pozisaun atu serbisu hamutuk ho Timor-Leste, hodi hametin relasaun amizade rai rua nian nudar familia ida deit.