Dili, 22 maiu (SRP) – Ministériu Interiór liu hosi Diresaun Nasionál Prevensaun Konflitu Komunitaria (DNPKK), Dissemina Planu Asaun Nasionál (PAN 1325) kona-ba Feto, Pas no Seguransa, faze daruak nian ba Komandu F-FDTL (Falintil-Forsa Defesa Timor-Leste), hodi promove igualdade jeneru iha instituisaun F-FDTL nia laran.
“Ita nia objetivu husi workshop ida ne’e atu halao servisu hamutuk ho Sekretária Estadu ba Igualdade no UN Women, oinsa atu haforsa F-FDTL nia komprimisiu kona-ba enkuadramentu legál internasional, no rejionál sira kona-ba igualdade jenéru no direitu feto sira nian inkliu observasaun kona-ba rezolusaun Konsellu Seguransa PAN 1325 nian”, esplika Lidia Lopes, ba jornalista sira iha Kuartel Jeral F-FDTL, Fatuhada, kuarta (22/05/2024).
Tuir nia, Timor-Leste nu’udar membru Nasoens Unidas nian, tenke hatudu nia komprimisiu ba implementasaun tratadus no akordu internasional sira.
“Agora kona-ba polítika no estratéjia nasaun membru ASEAN sira seluk mos fo importansia ba Igualdade jenéru inklui planu asaun rejionál feto paz no seguransa. Entaun liga ba ita nia militar sira hanesan F-FDTL mos presija iha kuñesementu klean ba PAN 1325 ne’ebe foka liu ba prosesu partisipasaun feto tanba dala wain sira hola parte iha asistensia no asesmentu ba misaun manutensaun paz iha Nasoens Unidas hodi kontribui ba paz iha mundu”, salienta.
Lidia Lopes afirma, importansia ajenda Feto, Pás no Seguransa iha Timór-Leste hanesan komprimisiu governo no estadu Timor-Leste ba implementasaun kompromisiu global ba dezenvolvimentu, hanesan Objetivu Dezenvolvimentu Mileniu, CEDAW no tratadus internasional sira seluk ne’ebe Timor-Leste adopta no ratifika ona.
Iha fatin hanesan, Xefe Estadu Maiór Jenerál (F-FDTL), Tenente Jenerál Domingos Raul Falur Rate Laek, hateten partisipsaun feto iha institusaun F-FDTL hatudu progresu diak.
“Ha’u orgulu tanba institusaun F-FDTL, partisipasaun feto iha mudansa, tanba iha ona ofisiál lubuk ida, ita bo’ot sira hatene foin daudaun maka Komandu F-FDTL halo promosaun deviza ba Tenente Marquita ba Kapitaun no agora daudaun membru F-FDTL nivél edukasaun mesak baxarelatu, lisensiatura no balun to’o ona nivél edukasaun masteradu”, dehan Falur.
Nia hatutan, Komandu F-FDTL sei la taka matan ba feto liuliu feto foti desizaun tuir rezolusaun ONU 1325 ne’ebé fó fatin ba feto atu kaer pozisaun iha instituisaun nia laran.
Iha biban ne’e Falur, mos louva Governu nia esforsu ba empoderamentu ne’ebé liga ba PAN 1325 faze daruak nian nu’udar aprosimasaun intenasionál ida ne’ebe mak Guvernu dezeña hodi envolve feto iha aspetu oi-oin.
Seminariu ne’e hetan prezensa hosi Sekretária Estadu ba Igualdade (SEI) interinu atual Sekretáriu Estadu Komunikasaun Sosiál, Expedito Loro Dias Ximenes, Embaixador Reino Unido ba Repúblika Indonezia no Timor-Leste, ofisiais superior sarjentu no prasa, Xefi UN Woman, Amy Nishta Satyam no-mos ajensia no parseria sira ne’ebe servisu hamutuk ba implementasaun PAN 1325 nian. #SRP
