Dili, 20 maiu 2024 (SRP) –Ministru Interior, Francisco da Costa Guterres, Ph.D, akompaña Prezidente Repúblika José Ramos Horta, hodi halo enseramentu ba Feira Promove Produtu Nasionais no Lokál ne’ebé hala’o durante semana ida hodi komemora loron restaurasaun independénsia Timor-Leste nian ba dala 22.
“Agradese ba Guvernu tanba organiza feira ida-ne’e lao diak tebes no parabéns ba Primeiru-Ministru, Vise-Primeiru Ministru, liu hosi Ministeriu Komersiu Industria ne’ebé halo koordenasaun diak ba programa bo’ot no difisíl maibé halo duni hodi enkoraja komunidade sira fan produtu lokál, artezenatu hodi promove ekonomia. Hau sei kolabora ho Guvernu hodi kontinua halo feira iha fulan agostu nia laran, inklui atividade desportu no-mós festivál kultura iha Maubisse”, esplika PR Horta, iha Portu Dili, segunda kalan ne’e.
Entretantu, Ministru Komérsiu Industria, Filipus Nino Pereira, hato’o agradesimentu ba mikro no empreza kiik sira inklui komunidade sira-nia partisipasaun kalan-kalan sempre mai harame feira nasional hodi promove sira-nia produtu lokál.
“Agradese ba komponente hotu, autoridade lokál, autoridade seguransa sira, liu-liu Instituisaun PNTL no F-FDTL ne’ebé asegura atividade ne’e to’o nia rohan sem distúrbiu. Espesiál ba inan aman sira ne’ebé durante semana ida nia laran bele lori sira-nia produtu hosi munisípiu mai partisipa iha ne’e, fiar katak durante loron lima bele hetan netik rendimentu ruma no ita sei organiza diak liután iha tempu tuir mai”, dehan Nino Pereira.
Hafoin halo enseramentu, Prezidente Ramos Horta, hamutuk ho membru Guvernu sira halo vizita ba baraka negosiate sira nian ne’ebé fa’an produtu oin-oin mak hanesan trasforma produtu lokál husi aihan ida ba aihan seluk, kafe, minamorin, sabaun, tua, sumos no sira seluk tan.
Feira ne’e mós laos deit fa’an aihan maibé iha artezenatu modelu oin-oin hanesan trasforma tais suku ba pasta, karteira, kamiza no lixu transforma ba materiál seluk, ukir ai ho modelu oin oin. #SRP
