Dili, 16 maiu 2024 (SRP) – Ministru Interiór (MI), Francisco da Costa Guterres, Ph.D, sai moderadór iha reuniaun ida ho parseria dezenvolvimentu sira, (sigla ingles;TLDPM-Timor-Leste Development Partners Meeting), ne’ebé hala’o iha Auditoriu Ministériu Finansas, Aitarak-Laran.
Tinan ida-ne’e, sorumutu TLDPM sai hanesan sorumutu dahuluk iha IX Governu Konstitusionál nian ho tema “Tempu halo Asaun: Planu ba Tinan Lima nian husi IX Governu Konstitusionál”, sorumutu ne’e sai hanesan plataforma atu hato’o no diskute kona-ba vizaun estratéjika no prioridade Governu nian ba tinan lima oinmai.
Reuniaun bilaterál Parseiru Dezenvolvimentu Timor-Leste hanesan konferensia anuál ne’ebé Governu Timor-Leste no Parseiru Dezenvolvimentu sira sempre hala’o iha Timor-Leste, ho nia objetivu maka atu reflete kona-ba dezafiu no susesu dezenvolvimentu ne’ebé antes ne’e hala’o ona no-mós buka dalan atu reforsa no aliña inisiativas dezenvolvimentu ne’ebé sai prioridade Governu Timor-Leste nian iha futuru.
Iha biban ne’e Ministru Interiór, Francisco da Costa Guterres, mós halo aprezentasaun ida hodi koalia kona-ba Planu Estretéjiku Seguransa Nasionál 2011-2030, iha kontekstu konsolidasaun baze seguransa iha territóriu laran tomak neébé hahú kedas hosi Krize 2006, rekonstrusaun no halo reforma, tranzisaun, transformasaun no rezilente no ikus mai hodi alkansa objetivu ka rezultadu espesífiku sira no ajuda atinji metas seguransa nian ba estabilidade tuir vizaun seguransa interna tinan 2030 nian.
Liu husi forum ida ne’e mós, fó oportunidade ba IX Governu no parseiru dezenvolvimentu sira hodi halo revizaun ba progresu hodi bele alkansa metas no objetivus dezenvolvimentu nasionál nian. Ho ida ne’e bele ajuda doadór sira atu aliña sira-nia asistensia dezenvolvimentu no aumenta sira-nia previzibilidade ajuda ba Timor-Leste.
Tuir ajenda sorumutu ne’e konta mós ho debate ne’ebé ko’alia iha área hirak importante hanesan setór dezenvolvimentu sosiál, setór dezenvolvimentu ekonomia, setór dezenvolvimentu infraestrutura, setór dezenvolvimentu institusionál no sei taka ho plenaria liu hosi Meza Redonda hodi fó biban ba sesaun pergunta no resposta, ne’ebé sei fó oportunidade ba kada Parseiru Dezenvolvimentu atu hato’o informasaun atualizada kona-ba sira-nia atividade no diskute aliñamentu ho prioridade estratéjika Governu nian.
Enkontru ne’e hetan partisipsasaun hosi Vise-Primeiru-Ministru Koordenadór Asuntus Ekonomikus no Ministru Turizmu no Ambiente Francisco Kalbuadi Lay, Vise-Primeiru-Ministru no Ministru Koordenadór Asuntu Sosiál, Ministru Dezenvolvimentu Rurál Abitasaun Komunitária, Eng. Mariano Assanami Sabino, Parseiru Dezenvolvimentu sira, Embaixadór Akreditadu no Korpu Diplomátiku, ONG Internasionál no Lokál sira inklui estrutura membru IX Governu Konstitusionál sira seluk. #SRP
