Dili, 07 maiu 2024 (SRP) – Membru PNTL Komandu Munisípiu Dili hamutuk 83, kompostu hosi Persaudaraan Setia Hati Terate (PSHT) hamutuk 41, Ikatan Kera Sakti (IKS) hamutuk 18, Kmanek Oan Rai Klaran (KORK) nain 8 no Sete-Sete (77) hamutuk 13 ohin entrega hikas atributu Artes Marsiais no Rituais ba Guvernu.
“Primeiru lugar hau lori governu nia naran hakarak hato’o parabéns tanba imi hotu ohin kasu tiha todan no hakarak servi de’it estadu. Ida-ne’e sai hanesan ezemplu ida imi no hatudu ba ema hotu katak ami polísia ne’e servi loos ba estadu no povu ida-ne’e. Hau kontente imi deside ida-nee, desizaun ne’e importante ba imi no povu ida-nee, hamriik firme ho vontade rasik hakarak servi rai no povu ida-nee”, dehan Ministru Interior, Francisco da Costa Guterres, perante nia diskursu iha Komandu PNTL Munisípiu Dili, tersa (07/05/2024).
Tuir nia, presenza Polísia nian liuhusi aktividades Polisiál iha komunidade nia leét iha fatin hotu hotu, halo komunidade sente seguru no hakmatek.
“Povu haree ita boot sira sente hakmatek bainhira haree imi-nia prezensa, tanba nee imi hatudu ba sira imi-nia prezensa iha komunidade nia leet hodi sira sente seguru, sente hakmatek hodi halao sira-nia servisu. Ita tenke hatudu no mai atu servi ho neutralidade, servi ho loloos, hamriik iha imi-nia fatin hodi servi povu ne’e”, subliña.
Governante ne’e realsa, ukun aan ne’e ema hotu hakarak livre, kontente, hakmatek, tanba ne’e polísia mak sei garante seguransa nasionál no estabilidade ba povu atu nune’e guvernu bele halo dezenvolvimentu.
Entretantu Komandu Jerál PNTL, Komisáriu Jerál Henrique da Costa, hateten serimónia ida-ne’e importante hodi bele desvínkula tiha PNTL hosi kualker grupu organizasaun seluk.
“Seremónia ne’e hanesan kontinuasaun husi atividade ne’ebé hala’o ona iha loron 07 dezembru tinan 2023 no ohin ita kontinua realiza tán juramentu hodi haketak ita-nia membru PNTL husi grupu GAM ho GAR hodi nune ba oin halo servisu ho profisionalizmu no kualidade. Atividade ne’e ita halo hodi hatudu ita-nia profesionalizmu atu nune labele hamosu dúvida ba povu katak ita hamrik iha Lei no Ordem Laos atu mete ba grupo GAM ho GAR”, dehan Komisáriu Jerál Henrique.
Biban ne’e Komisáriu Jerál, Henrique da Costa husu atu wainhira halo atuasaun iha terenu tenke respeita nafatin ba direitus umanus iha kualker situasaun.
“Husu mós ba membru sira hotu atu hakruk ba Lei no Ordem ne’ebé atribui, servisu tuir de’it ita nia kompetensia, ida ne’ebé maka laos kompetensia ita nian labele ba mete hodi povu labele dúvida ho ita-nia profesionalizmu”, alerta.
Alende ne’e Komandante Komandu Munisípiu Dili, Superintendente Xefi Polísia Orlando Gomes, husu atu membru sira atu husik buat hotu servisu de’it ba nasaun no povu.
“Ohin ita hamutuk asiste serimónia importante tebes, hodi asiste membru hamutuk 83 ne’ebé uluk envolve iha Grupu Arte Marsiais no Rituais halo juramentu no komprimisiu atu ba oin halo servisu tuir de’it lei no ordem hodi serve povu. Tan ne’e husu ba membru sira agora ba oin, rai iha kakutak tau iha neon atu husik buat hotu haree de’it ba ita-nia misaun prinsipál hodi atinji objetivu instituisaun PNTL nian”, sujere.
Iha fatin hanesan, Prezidente Komisaun B Parlamentu Nasionál (PN), Domingos Augusto”Deker, agradese ba Komandu Jerál bele organiza serimónia importante ida-ne’e lao ho diak.
“Nudar komisaun ne’ebé tutela ba asuntu Defeza, Relasaun Externa no Seguransa Nasionál, hau orgullu ho eventu ida-ne’e tanba ita hahú ona pasu ida husi ita-nia komprimisu rasik tuir planu governu konstitusionál define. Parabéns ba Komandu Jerál, Komandu Munisípiu no Komandu Unidade sira bele organiza eventu ida-ne’e liu liu ba membru sira ne’ebé ohin deklara a’an iha públiku hodi hatete katak sai ajente estadu neutru serve de’it povu”, dehan Deker.
Nia hateten, desijaun ne’ebe membru PNTL sira halo ne’e ho konsensia rasik no nia konsidera katak sira mak sei sai heroi foun nasaun nian.
“Ita bot sira maka esperansa povu nasaun nian no desijaun ida-ne’e laos obriga malu. Ita bo’ot sira povu eskolla hodi serve no proteje no sei sai esperansa ba povu no nasaun. Ba imi hau-nia maun alin sira atu fiar ida-ne’e labele monu let de’it tenke hatudu iha prátika hodi justifika. Prosesu atu eroi ba nasaun laos fasíl maibé imi maka sei sai eroi foun, sai ezemplu no estafeta ba jerasaun sira tuir mai hodi banati tuir erois no martir sira ne’ebé maka fó a’an ona ba independénsia Timor nian” Deker fó hanoin.
Serimónia ne’e, marka prezensa husi Ministru Juventude Desportu Arte no Kultura, Nelyo Isac Sarmento, Segundu Komandante Jerál, Komisáriu Pedro Belo, Prezidente Komisaun Reguladora Arte-Marsiál (KRAM), Octaviano da Conceição, Komandante Unidade, Eskuadra no-mós lider Arte Marsiais no Arte Rituais. #SRP
