Manatuto, 05 maiu 2024 (SRP) – Ministru Interior, Francisco da Costa Guterres, Ph.D, akompaña Primeiru Ministru Kay Rala Xanana Gusmão, halo Lansamentu Balkaun Úniku no-mós Resenseamentu Atualizasaun Kartaun Biométriku hodi hamenus birokrasia no hadia kualidade atendementu publiku iha Munisipiu Manatuto.
Balkaun Úniku mak inovasaun importante ida husi IX Governu atu lori servisu públiku hodi besik ba sidadaun sira. no Balkaun Úniku ida ne’e sai hanesan Portal Governu Sentral ne’ebé maka reprezenta IX Governu hodi lori governasaun ne’e besik liu ba povo hanesan servisu Integradu husi liña ministeriais sira hodi fasilita atendimentu ba trata dokumentu sira hanesan Billeti Identidade, Sertidaun RDTL, Pasaporte no-mós Rejistu Kriminal, aleinde ne’e servisu Integradu sira seluk husi Ministériu Saúde, Ministériu Agrikultura, Pekuária, Peska no Florestas, Protesaun Sivil, Ministériu Solidariedade Sosiál no Inkluzaun nomós liñas ministeriais sira seluk sei integra hotu balkaun refere.
Programa ida ne’e parseria entre Programa Nasoins-Unidas ba Dezenvolvimentu (PNUD) no Ministériu Administrasaun Estatal (MAE) atu promove prosesu desentralizasaun no prestasaun servisu iha nivel lokál. Enkuantu kona-ba Resenseamentu Atualizasaun Kartaun Biométriku nian, Ministériu Administrasaun Estatal (MAE) servisu hamutuk ho UNDP no-mós Ajensia TIC TIMOR, I.P hodi dezenvolve portal online ida ne’e.
Serimónia ne’e hetan partisipasaun másimu husi membru IX Governu Konstitusional, Prezidente Tribunal Rekursu, Reprezentante Prezidente Parlamentu Nasional, Xefí Estadu Maiór – Jeneral F-FDTL, Komandante Jerál Polisia Nasional Timor-Leste, Prezidente Autoridade Munisípiu sira, lider relijiozu, sosiedade sivil, veteranu no-mós komunidade sira. #SRP
