Dili, 30 abril 2024 (SRP) – Ministériu Interiór liu hosi DNPKK (Diresaun Nasionál Prevensaun Konflitu Komunitaria), realiza seminariu hodi halo Diseminasaun Planu Asaun Nasionál (PAN 1325) kona-ba Feto, Pas no Seguransa, faze daruak nian ba kargu xefia sira nune’e bele habelar informasaun kona-ba prosesu partisipasaun feto nian ligadu ba PAN 1325 ne’e rasik.
“Ohin ita halo semináriu ida-ne’e ho nia objetivu maka atu fahe informasaun ba kargu diresaun no xefia sira hodi bele hatene no iha kuñesimentu klean kona-ba PAN 1325 ne’e rasik tanba Ministériu Interior mak sai hanesan instituisaun implementadór ne’ebé lidera hela proseesu tomak”, esplika Diretora Nasionál DNPKK, Lidia Lopes de Carvalho, iha salaun City 8, Has-Laran, Suku Manleuana, Postu-Administrativu Dom-Aleixo, tersa ne’e.
Tuir nia, semináriu ne’e importante hodi asegura funsionáriu sira nia sensibilidade nune’e bele entende ho di’ak kona-ba igualdade jéneru iha aspetu feto ba mudansa.
“Implementasaun PAN 1325 ba tinan 2024 nian ita tenta atu foka liu ba kargu diresaun xefia nian no sei halo desiminasaun ba iha komunidade, joventude, autoridade lokál no instituisaun relevante sira iha munisípiu atu nune’e sira mós bele hatene kona-ba rezolusaun planu asaun nasionál nee rasik”, relata.
Lidia Lopes, salienta Guvernu nia komitmentu adopta rezolusaun Nasoens Unidas PAN 1325 nune’e bele hamenus risku ba feto no labarik feto sira sai vítima ba violénsia.
Partisipa iha workshop ne’e envolve Diretór Jerál Administrasaun Finansas, Mariano de Araujo, Diretór Gabinete Planeamentu Estretéjiku, Bendito Jose Casimiro, Diretór Nasionál Rekursu Umanu, Julião Fernandes, Diretór Nasional DNSPP, Januario Barreto, Sosiedade Sivíl, inklui kargu diresaun no xefia sira hosi diresaun sivil no-mós PNTL. #SRP
