Dili, 27 abril 2024 (SRP) – Asosiasaun Espoza Polísia Nasionál Timor-Leste (AES-PNTL), sábadu ne’e selebra aniversáriu tinan-ida ezisténsia servisu halo asaun karidade ba membru PNTL no família sira ne’ebé enfrenta difikuldade oi-oin iha Timor-Leste.
Ministru Interior, Francisco da Costa Guterres, Ph.D, iha lia-fuan badak kongratula AES PNTL tanba bele promove no haburas fraternidade no koezaun entre espoza instituisaun PNTL tomak.
“Hau lori Guvernu nia naran fó parabéns ba AES PNTL ne’ebé ohin kompleta nia ezistensia halo tinan ida. Guvernu hakarak agradese ba AES tanba tanba entre fen ho laen suporta malu sai baze ba família ida forte bele hodi ajuda PNTL halo servisu ho diak”, hateten Ministru Francisco, iha Sentru Formasaun Polísia (sigla portugés;CFP), Comoro, sábadu (27/04/2024).
Tuir nia, AES halo misaun importante tanba halo solidariedade hodi enkoraja no suporta misaun Polísia nian tuir espetativa sosiede timorense nian tan ne’e sei Guvernu sei fó apoiu totál.
“Imi-nia papel ne’e diak tebes ohin hau rona atividade importane lubuk ida maka halo ona hosi nasionál to’o munisípiu. Membru balu monu ba susar ita bo’ot sira iha solidariu fó korajen ajuda sira. Ita bo’ot sira nia prezensa importante hodi haforsa sira. Tanba ne’e atu informa mós katak Guvernu prontu apoiu AES PNTL no daudaun ne’e Lei Orgánika rasik ita tau artigu ida kona-ba AES PNTL nian nune’e semana oin ita sei deskute artigu ne’e tanba sai nudar baze legál ida hodi fó apoiu ba membru PNTL no família sira”, konfirma.
Iha biban ne’e Francisco Guterres, dezafia AES atu organiza malu halo asaun karidade lao ba haree kondisaun moris membru no komunidade kbit laek sira ne’ebe enfrenta situasaun difisil moris nian iha area fronteira.
“Hau vizita ba fronteira hodi haree kondisaun sira nian difisil tebes no sira iha situasaun susar mesak iha ailaran hodi tau matan ba ita- nia fronteira. Tanba ne’e hau fó servisu ba imi atu servisu hamutuk ho mediku sira atu haree ita-nia ema sira iha fronteira hodi halo teste saúde ba sira”, sujere”, fó hanoin.
Entretantu, Segundu Komandante Jerál PNTL, Komisáriu Polisia Pedro Belo, afirma Komandu Jerál sempre fó apoiu ba atividade ne’ebé lori mudansa ba difikuldade ne’ebé membru sira enfrenta.
“Atu dehan deit katak ami nain rua Komandante Jerál sempre fó apou 100% ba atividade AES PNTL nian. Ami sempre iha hanoin dia katak ita tenke organiza malu hodi hametin unidade, kria armonia entre espoza no espozu sira liu hosi servisu hamutuk aprende organiza maluk sira seluk sai lider”, argumenta.
Pedro Belo, hatutan, daudaun ne’e nia parte finaliza ona estatutu AES nian no tempu besik sei lori ba rejista iha notariadu.
Serimónia aniversariu ne’e hetan prezensa hosi Diretór Jerál, Sekretaria Estadu Igualdade (SEI), Armando da Costa, Prezidente AESPNTL, Manuela de Araújo no Vise Prezidente AESPNTL, Laticia Valente, parseria dezenvolvimentu sira, Komandante Komandu Operasaun, Inspetór Jerál, Diretór Departamentu Justisa e Disiplina, Komandante Munisipiu, Komandante Unidade, Xefe Departamentu no Xefe Seksaun sira, Ofisiais Superiór, Ofisiais Subalternu, Sarjentu no ajente, família boot AES PNTL no hetan animasaun hosi orfanatu sentru madre Alma Bebonuk no Departamentu Polisiamentu Komunitaria Nasionál. #SRP
