GUVERNU PREPARA SIMU VIZITA LIURAI BRUNEI DARUSSALAM

DILI, 18 abril 2024 (SRP)-Ministru Interior (MI), Francisco da Costa Guterres Ph.D, partisipa enkontru koordenasaun entre liñas ministeriais ne’ebé lidera hosi Vise-Primeiru Ministru, Ministru Kordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, iha Ministériu Turizmu no Ambiente, Farol Dili, Kinta ne’e.

Objetivu hosi enkontru ne’e atu forma komisaun organizadora ida hodi simu bainaka espesiál Liurai Brunei Darusallam, Haji Hassanal Bolkiah Mu Izzaddin Waddaulah, ne’ebe sei vizita Timor-Leste iha tempu badak.

Governu sei halo preparasaun másimu hodi simu liurai Haji Hassanal Bolkiah Mu Izzaddin Waddaulah, tanba Brunei Darussalam nuudar nasaun ne’ebé desde inísiu, sempre apoiu Timor-Leste atu adere ba Asean.

Tuir planu, liurai Brunei Darusallam, sei mai vizita Timor-Leste, iha loron 20 fulan maiu tinan ne’e, au mezmu tempu hodi asiste mós selebrasaun loron restaurasaun independénsia Timor-Leste nian bá dala 22.

Partisipa enkontru ne’e, mak hanesan, Ministra Edukasaun, Ministra Saúde, Xefe Kaza Sivíl, Vise Ministra Asuntu Asean inklui ofisiais PNTL no F-FDTL. # (Charlly/Rival).