Dili, 03 abril 2024 (SRP)- Ministru Interior, Francisco da Costa Guterres, Ph.D, partisipa serimonia lansamentu programa “Futuru Lider ba Asean (FLBA)”, ne’ebé konsidera hanesan investimentu importante atu dezenvolve kapasidade foinsa’e Timor-oan sira iha futuru nasaun nian.
Primeiru Ministru (PM), Kayrala Xanana Gusmão, hateten katak programa ne’e importante tebes’ hodi promove futuru lider ba ASEAN no promove inovasaun hodi kontribui ba futuru sustentavel no prósperu.
“Ha’u hakarak atu rekoñese no kongratula jovem sira ne’ebe partisipa iha programa ne’e. ita-boot sira hanesan investimentu ida diak iha futuru. Ita hotu hatene katak, dezenvolve lideransa jerasaun foun ne’e krusial tebes iha nasaun hotu-hotu maibe ida ne’e partikularmente importante ba Timor-Leste tanba ita hahú ona preparasaun finál atu tama ba ASEAN”, esplika PM Xanana, perante nia diskursu ne’ebe hala’o iha salaun multiusos Bebora.
Nia dehan, programa ida-ne’e nu’udar kompromisu ida ba kooperasaun no integrasaun rejionál hodi marka pasu signifikativu ida ba dezenvolvimentu nasionál.
“Dezenvolvimentu Timor-Leste nian depende liu ba ita-nia rekursu umanu no empoderamentu ba ita-nia potensialidade umanu. Tanba ne’e mak ita investe hela iha lider jerasaun foun sira. Ita identifika ona dezenvolvimentu umanu no kapitál sosiál nu’udar área prioridade ba investimentu, hamutuk ho diversifikasaun ekonómika, dezenvolvimentu infraestrutura, no governasaun diak”, salienta.
Xefi Guvernu ne’e akresenta, Timor-Leste nu’udar nasaun joven ida-ne’ebé iha potensialidade hodi investe iha joventude foin-sa’e sira inklui lideransa sira iha futuru atu hala’o papél importante ida hodi aselera dezenvolvimentu nasaun nian.
“Ami kompromete atu kria oportunidade sira ne’ebé permite foin-sa’e sira atu kumpre sira-nia potensialidade. Ami fiar katak investimentu iha lideransa sira ba futuru sei ajuda ita-nia nasaun atu halo navigasaun di’ak liu ba dezafiu globál sira, nune’e mós promove inovasaun no kontribui ba futuru ne’ebe sustentavel no prosperu”, afirma.
“Ha’u kontente tebes ohin ita halo lansamentu ba Programa Lideransa Futuru Timor-Leste nian ba ASEAN no sente onra tebes tanba ohin Sekretariu-Jeral ASEAN nian, Dr. Kao Kim Hourn, hamutuk ho ita iha ne’e hodi demonstra nia apoiu Timor-Leste nia adezaun ba membru permanente ASEAN”, subliña.
Iha fatin hanesan, Sekretariu-Jeral ASEAN, Dr. Kao Kim Hourn, kongratula jovem sira no hato’o nia prontidaun atu servisu hamutuk hodi prepara Timor-Leste nia adezaun tomak inklui mós atu kumpre rekizitu sira ne’ebé ASEAN hatuur no mós atu hasa’e ninia kapasitasaun.
“Jovem sira iha papél importante hodi forma dalan ba dezenvolvimentu no potensialidade ASEAN nian. Nune’e hau fó parabéns ba Timor-Leste tanba hahú programa ida-ne’ebé bele fó impaktu boot ba identidade ASEAN nian iha Timor-Leste”, esplika Dr. Kao Kim Hourn.
Sekretáriu-Jeral ASEAN mós hato’o nia konfiansa no benefísiu hosi programa ne’e sei lori pasu pozitivu ba ASEAN no Timor-Leste bainhira sai membru ASEAN tomak.
Serimonia ne’e lansa direta hosi PM Xanana ho Sekretáriu-Jeral Kao Kim Hourn no hetan akompañamentu hosi Ministru Juventude Desportu Arte Kultura (MJDAK), Nelyo Isaac Sarmento, Ministra Edukasaun, Dulce de Jesus, Vise-Ministra ba Asuntus ASEAN nian, Milena Rangel inklui reprezentante FLBA nain rua.
Entretantu serimonia ne’e hetan partisipasaun hosi membru Governu sira, Korpu Diplomatiku, reprezentante sira husi setór privadu, ajénsia internasionál sira, sosiedade sivíl no akadémiku sira inklui peritus sira hosi sekretariadu ASEAN nian. #AX
