Dili, 1 abril 2024 (SRP) –Sekretáriu Estadu Protesaun Sivíl, Domingos Mariano Reis segunda feira ne’e prijide Seremónia Isar Bandeira Nasionál semana dahuluk iha resintu Vila-Verde.
“Kada Diresaun ida-idak hatene kona-ba ezekusaun programa orsamentu Diretór labele haluha update relatóriu kada sesta, labele hein to’o fim do mes, ita tenke hatene ita-nia dotasaun programa kada diresaun tutela sira, orsamentu hira, atinjimentu progresu servisu to’o iha ne’ebé. kada diretór ida-idak tenke hatene nia orsamentu, programa no ezekusaun, ezekusaun tenke tuir regras no prosedimentus”, Sekretariu Estadu Protesaun Sivíl akresenta.
Governante IX Governu ne’e kontinua fanun kargu diresaun no xefia inklui funsionáriu sira tenke konsolida forsa traballu ho responsabilidade tékniku hodi atinji meta no objetivu ne’ebé Ministériu Interior planea.
“Diretór ida-idak tenke hatene programa no progresu servisu nia atinjimentu, servisu iha ekipa atu konsolida ita-nia forsa traballu hodi atinji tuir planu ida-idak nian. Servisu iha valór responsabilidade tékniku, responsabilidade jestór no responsabilidade polítika nivel altu nian. Valór imparsialidade, valór respeitu, nee signifika katak tenke neutru no labele kontra regras ezekusaun”, governante ne’e bolu atensaun ba jestór sira, iha resintu Vila-Verde.
Ikusliu membru IX governu konstitusionál ne’e enkoraja jestór sira atu ezekuta Programa tuir metas signifika katak diresaun ida-idak tenke ezekuta másimu 25 porsentu ba kada trimestre. Mantein disiplina, konsolida no unifika forsa traballu hodi bele atinji ita-nia metas no objetivu iha Ministériu interior. #SRP
