Dili, 01 abril 2024 (SRP) – Polísia Nasionál Timor-Leste (PNTL), liu hosi Servisu Informasaun Polísia Nasionál (SIPN) junta Unidade Falintil, asegura joven mane nain-2 iha area Bebonuk tanba envolve krime jerál ba kazu naok motór iha area Bebonuk wainhira família vítima selebra hela natál hamutuk iha loron 25 dezembru 2023, tuku 02:00, madrugada.
Suspeitu nain rua ne’e ho inisiál CMS (19) ho suspeitu ida seluk ho naran HAML (estudante 16) sira nain rua hela iha Aldeia 20 setembru, Suku Comoro, Postu-Administrativu Dom Aleixo, Munisípiu Dili. Enkuantu suspeitu HAML, antes ne’e komete ona kazu hanesan naok motór, hadau telfone iha dalan públiku inklui naok komunidade nia asu ne’ebé nia rejista kriminál iha ona PNTL.
Iha suspeitu CMS sira-nia deklarasaun katak nia maka ba iha vítima Joanina Soares nia rezidénsia hodi dudu sai motór no entrega ba suspeitu HAML hodi kondus motór refere tamba nia lahatene kondus motorizada. Nune’e sira nain rua mós kolabora ho diak hodi entrega fali motorizada ne’ebé sira hadau hosi vítima.
Hafoin halo identifikasaun, Xefi Ekipa entrega diretamente suspeitu nain-2 hamutuk ho evidénsia ba Departamentu Investigasaun Kriminál Eskuadra Dom-Aleixo hodi halo prosesu investigasaun klean. #AX
