Dili, 27 marsu 2024 (SRP)- Ministru Interior, Francisco da Costa Guterres, Ph,D, partisipa iha seremónia komemorasaun Aniversáriu Polísia Nasionál Timor-Leste (PNTL) ba dala 24 ne’ebé hala’o iha instalasaun Kuartel Unidade Espesiál Polísia (UEP) Bairo Pite.
“Hau fó parabéns ba Polísia Nasionál Timor-Leste ne’ebé selebra sira-nia aniversáriu ba dala 24 ho forsa ida ne’ebé profesionál, iha kompeténsia téknika no operasionál ho reziliente hodi hasoru obstákulu sira no adapta ba dezafiu foun sira”, esplika PR Horta perante nia diskursu.
Prezidente hato’o mós ninia agradesimentu kle’an ba parseiru internasionál sira hanesan Austrália, Xina, Korea Súl, Estadus Unidus, Malázia, Portugal, Brazil, Indonézia, no sira seluk tán ba sira-nia apoiu importante iha formasaun ofisiál sira, fornese ekipamentu no fahe koñesimentu hodi hametin PNTL dezde independénsia durante tinan 20 nia laran.
“Hau-nia agradesimentu boot liután ba Polísia Federál Austrália sigla inglés –AFP ne’ebé sai modelu ida diak liu no laiha multiplikasaun. Hau-nia agradesimentu hato’o mós ba nasaun Indonézia, parseiru ida importante liu ba ita tanba fronteira terrestre no aero, marítima koolabora ho diak tebtebes, sira mós tulun ita iha seitór seguransa no apoiu ita hodi adere ba AZEAN, sira mós apoiu ita-nia elementu Servisu Imigrasun, Polísia nasionál Timor-Leste”, akresenta.
Iha biban ne’e, Prezidente Repúblika husu ba instituisaun estadu sira tau importansia ba asuntu igualdade jéneru no-mós programa barak ba juventude sira.
“Hau hakarak instituisaun sira tenke promove feto iha aspetu oin-oin hanesan iha Polísia no instituisaun sira. Iha tinan hira nia laran PNTL laiha evidénsia ke mane matenek liu feto, tantu iha F-FDTL, no instituisaun sira númeru feto sei menus, presija konsidera no eleva sira-nia kapasidade hodi bele kompete ho ema seluk, no buka troka opinioens ho joven sira liuliu envolve sira iha programa instituisaun governu nian”, Xefe Estadu afirma.
Ramos-Horta mós subliña papél importante feto sira-nian iha PNTL no sosiedade, hodi husu ba feto sira-nia empoderamentu no oportunidade ne’ebé hanesan, inklui iha pozisaun lideransa aas sira iha forsa polísia nian.
“PNTL no Defeza hanesan lutu nasaun nian ne’ebé asegura seguransa tan ne’e labele hetan foer ruma iha laran, tenke dixiplina 100% hakarak forsa polisiál ida ne’ebé aas liu iha mundu, iha demokrasia hola parte iha komportamentu diak liu ba ema hotu tanba estadu no povu tau fiar ba imi”, PR konklui.
Iha fatin hanesan, Ministru Interior Francisco da Costa Guterres, hato’o nia apresiasaun ba membru PNTL tomak ba empeñamentu, dedikasaun, firme no brani durante halo sira-nia misaun.
“Tema ba ohin loron maka “Profesionalizmu no Reziliénsia”, ne’e refleta katak sira servi ho profesionál no reziliente hodi labele monu ba kualker tentasaun, sira tenke hamriik metin iha fatin, sira kaer ba lei ho ordem, sira sei la halis ba ema ruma sira tenke hamriik defende estadu no povu nia interese iha rai ida-ne’e”, hateten Francisco Guterres, ba jornalista sira iha Kuartel UEP.
Governante ne’e rekuñese PNTL hasoru difikuldades iha rekurzus umanus ne’ebé maka seidauk sufisiente.
“Tinan ida-ne’e ita sei halo rekrutamentu, agora tama ona iha faze ida ne’ebé sai mós iha, tama mós iha, ami tenke estuda didi’ak hodi priense nafatin fatin mamuk sira ne’ebé iha, aumezmu tempu atinji tiha númeru ida ne’ebé mak ita hakarak. Iha mós problema seluk kona-ba ekipamentus, agora sei halo levantamentu ba ekipamentus tomak ne’ebé PNTL iha atu nune’e ita bele hatene katak nesesidade PNTL ne’e, ekipamentus ida ne’ebé mak iha ona, no sira ne’ebé mak seidauk iha governu tenke tau, buka esforsu tomak para atu bele halo servisu ho di’ak”, salienta.
Iha prosesu rekrutamentu ne’e sei fó liu konsiderasaun ba kestoens jeografia, kestoens munisípiu liu-liu kapasidade téknika no intelektuias hodi bele dezenvolve mós instituisaun PNTL ho mós rai ida-ne’e.
“PNTL mós sei hasoru problema boot kona-ba kestoens de infraestruturas, fatin barak sei iha problema, tanba ne’e mak importante oinsá ami sei tau infraestrutura hahú husi fronteira, mai iha postus, eskuadras, kuarteis munisipais, kuartel jerál mós hahú book ona para fó fatin dignu ba sira hodi hala’o servisu”, fundamenta.
Kestiona kona-ba rekrutamentu, ezekutivu ne’e hateten sei liuhosi kriteria ne’ebé rigorozu tanba liuhosi teste médiku, saúde, lingua, fíziku no sidadania no kriteria seluk tan atu nune’e bele iha kapasidade ne’ebé aas liu atu bele servisu ho komunidade.
“Agora kona-ba atu halo promosaun primeiru tenke prienxe kriteria no rekezitu modalidade ne’ebé mak iha hanesan haree uluk kona-ba antiguidade, komportamentu, dixiplinar”, hakotu.
Serimónia ne’e, asiste mós husi Deputadu sira hosi Komisaun B Parlamentu Nasionál, Komandante Jerál PNTL, Diretór Jerál Servisu Migrasaun, Eis Komandante Jerál PNTL sira, parseria dezenvolvimentu sira husi TAF (The Asia Foundation) no TLPDP (Timor-Leste Program Development Police) no-mós entidades sivíl sira.# (Fatinha/Oser) bele asesu iha video nee.
