HAMETIN LASU AMIZADE, KAPOLDA NTT SEI PARTISIPA LORON ANIVERSARIU PNTL IHA DILI

Batugade, 26 marsu 2024 (SRP) – Atu hametin relasaun servisu hamutuk ho Polísia Nasional Timor-Leste (PNTL), Kepala Kepolisian Daerah Nusa Tenggara Timur (Kapolda NTT) Irjen Pol. Daniel Tahi Monang Silitonga, S.H., M.A., ho komitiva iha tersa (26/03/2024) lorokraik ne’e maizumenus tuku 15.00 OTL iha Postu Integradu Fronteira Mota-Ain Batugade.

Vizita ofisial ne’e simu direta hosi ofisiais PNTL sira ne’ebe lidera hosi Segundu Komandante Unidade Patrullamentu Fronteira (UPF), Superintendente Asistente Polísia, Carlos Moniz Maia, no hetan akompañamentu hosi ofisiais servisu Postu Integradu Fronteira.

Iha nia vizita mai Timor-Leste, Kapolda NTT ne’e rasik hetan akompañamentu hosi Kapolres Kupang no Kapolres Belu, hamutuk ema nain 30 ho kareta 10 ne’ebe mai hodi partisipa serimonia aniversariu PNTL nian ba dala 24 ne’ebe maka sei hala’o iha instalasaun Unidade Espesial Polisia (UEP), iha loron aban 27 marsu 2024.

Prezensa Kapolda NTT ne’e mos hanesan pasu importante ida atu hametin nafatin lasu amizade entre nasaun rua nian hodi halo prevensaun no kombate krime transnasional liu-liu iha area fronterisa sira hanesan Mota Masin, Mota-Ain no Wini.

Durante vizita ne’e, delegasaun hetan apoiu seguransa hosi Ekipa Zebra Tranzitu Komandu Munisipiu Bobonaro, Eskuadra PNTL Batugade inklui servisu protokolu Komandu Jeral PNTL. #AX