Dili, 08 Marsu 2024 (SRP) – Sesta feira ne’e Ministru Interior Francisco da Costa Guterres partisipa serimónia loron internasionál ba feto ne’ebé selebra iha Quartel Jerál PNTL Caicoli.
Perante diskursu Ministru Interior kongratula feto sira iha territóriu nasionál ne’ebé mak ohin loron selebra loron internasionál iha mundu tomak.
“Koalia kona-ba feto hanesan mós koalia kona-ba futuru nasaun ida nian, wainhira ita investe ba feto ita mós investe ba nasaun ida nia futuru, tanbasá maka ha’u dehan nune, feto maka sai hanesan primeiru profesora ba labarik sira-nia moris, liuhusi attitude, hahalok, feto maka sei forma, ho razaun ne’e mak mundu rekoñese hodi komemora loron espesiál ida-ne’e ba feto iha Mundu Tomak,” tenik nia
Governante ne’e kontinua enkoraja feto Timor-Leste nafatin sai exemplar ba kiik oan sira iha moris família no sosiedade.
“Iha timor ita koñese liu ho moto ida hateten dehan feto forte nasaun forte, tanba feto maka sai mestra hodi fó valores ba jerasaun tuir mai para atu hatutan mehi no dezenvolve rai ida-ne’e ba oin,” dehan MI.
Orgaun Superiór Administrasaun Públika ne’e salienta, “Lori IX guvernu konstitusionál nia naran hakarak kongratula feto sira iha territóriu nasionál inklui PNTL, no-mós Feto sira iha Ministériu Interior, ba imi hotu ha’u husu nafatin hodi dezempeña imi-nia papel hodi nafatin dezenvolve ita-nia rai no nasaun”.
Feto iha kbit ne’ebé hatene fahe nia papel, feto lori papel ida ne’ebé todan tebes, karik nia hanesan membru polísia tenki hala’o servisu tuir polísia alende ida-ne’e nia mós sai hanesan inan ida hodi haree ba nia oan sira.
“Husi kedas 2007, ha’u tama hanesan membru governu, ha’u promove kedas ona, hau hakas ona ba buat ne’e, tanba ha’u haree katak papel ida-ne’e papel importante para bele dezempeña no transforma sai hanesan misaun ba nasaun hodi hadia rai ida-ne’e”.
“Ha’u mós halo negosiasaun ho UN Women hodi hamosu PAN-1325, Feto Paz no Seguransa hodi rezolve problema iha kraik, ha’u koko hamosu tan Diresaun Nasionál Prevensaun Konflitu, no feto sira maka sai hanesan mediadores hodi rezolve problema, feto barak maka rezolve problema, iha mós problema balu ne’ebé mane labele rezolve maibé feto sira bele, husu ba mane sira nafatin fó apoiu ba papel ida-ne’e hodi bele dezenvolve estadu no nasaun”, tenik MI.
Ministru Interior dehan, negosiasaun lubuk ida sira hala’o ona, servisu ho domin ho kuidadu para atu buka solusaun, kontenti teb-tebes mai hamutuk ho imi hotu iha ne’e, kontenti mós tanba durante ne’e PNTL fó oportunidade ba feto sira, ohin loron iha Komandu jerál, ita boot sira iha ofisiais superiór hamutuk 4, ida-ne’e hatudu katak PNTL avansa daudaun ona, lao ho di’ak, ha’u mós hakarak husu para komandu PNTL proteje feto sira hodi halo servisu ho di’ak”, MI akresenta.
Ikusliu governante ne’e husu atu implementa kódigu konduta ne’ebé aprova iha fulan hirak ba kotuk iha servisu fatin no iha ne’ebé de’it. Hanesan membru PNTL, oinsá atu bele proteje no defende feto, para sira hala’o sira- nia servisu ho di’ak liután, “ha’u mós husu ba feto sira tau imi-nia aan didi’ak, kuidadu imi-nia aan tanba labarik sira atu sai di’ak ka att sira haree ba imi, sira la haree mai ami mane, inan hanesan espellu ba labarik sira”, hateten MI iha kuartel Jerál PNTL Caicoli hafoin termina diskursu.
Seremónia ne’e konta ho prezensa husi Komandante PNTL, Komisáriu Jerál, Henrique da Costa, Segundu Komandante, Komisáriu Jerál Pedro Belo estrutura Komandu PNTL ho espoza, bainaka no parseiru sira husi UN-WOMEN, TLPDP, CARE INTERNASIONÁL no seluk seluk tan.
