𝐃𝐢𝐥𝐢, 7 agostu 2023 – Segunda feira ne’e, Ministru Interior (MI), Francisco da Costa Guterres, Ph.D, hala’o enkontru ho enkarregada Negósiu Austrália mai Timor-Leste, Sra. Caitlin Wilson, ho komitiva, hodi ko’alia kona-ba kontinuasaun kooperasaun Servisu, iha Gabinete Ministru Interior Vila-Verde.
“Ohin halo enkontru ho Ministru Interior ho nia objetivu kona-ba kooperasaun servisu liu-liu vizaun ne’ebé adekuadu kona-ba area prioridade sira hodi dezenvolve seitór seguransa nian husi TLPDP (Timor-Leste Police Development Program), hodi dezenvolve di’ak liután Polísia Nasionál Timor-Leste (PNTL), Servisu Migrasaun ba iha programa Migration Information and Data Analyst System (MIDAS), ne’ebé foin implementa tinan kotuk, no ikus kooperasaun ba iha dezastre nian liuhusi Autoridade Protesaun Sivil.” Haktuir husi Caitlin Wilson, hafoin remata enkontru ne’e.
Enkontru ne’e konta ho prezensa husi Adjuntu Diretór Jerál Servisu Migrasaun Inspetór Xefi Polísia, Bernardo Freitas, TLPDP (Timor-Leste Police Development Program), Komandante Daren Boy. #Abui
