Díli, 21 agostu 2023 (SRP) – Ministru Interior, Francisco da Costa Gueterres, Ph.D, simu vizita badak hosi Xefi Ezekutivu (CEO;Sigla Ingles) hosi empreza East Timor Trading (ETT), Sam Aluwihare hamutuk ho ekipa, hodi aprezenta progresu empreza nian ne’ebé halo operasaun kleur ona iha Timor-Leste.
“Objetivu husi enkontru ne’e atu kongratula Ministru ba kargu foun no ami koalia mos kona-ba kooperasaun servisu kona-ba ami nia vizaun servisu ETT nian ne’ebé sei fó servisu ba traballador 1% husi total populasaun Timor nian”, Esplika Sam Aluwihare, hafoin remata enkontru ne’e iha Ministeriu Interior, Vila-Verde, segunda, (21/08/2023).
Tuir nia, ETT nudar empreza bot ida halo servisu iha Timor-Leste liu hosi distribuidor sasán konsumidor liu 1300 iha munisipiu hotu iha nasaun ne’e.
“Ami nu’udar fornesedór servisu ne’ebé fiar metin ba Timor-Leste iha hodi fornese marka prémiu no satisfasaun ba kliente ne’ebé Exesionál inklui fo atendimentu ba kliente ne’ebé di’ak no marka ho kualidade aas ho folin ne’ebé baratu”, subliña.
Hatan ba ida ne’e Ministru Interior hateten, presija iha kooperasaun diak ho seitores públiku ne’ebé importante atu nune´e parseiru internasionál bele halo koperasaun ho emprezarius nasionais sira hodi bele aselera prosesu dezenvolvimentu sustentavel iha rai Doben Timor Leste. #
Autor : Elisa
Editora : Fatinha
Fotos : Abui
