Dili, 29 agostu 2023 (SRP) – Ministru Interior, Francisco da Costa Guterres, Ph.D, hateten, Polítika Governu nian haree ba iha Organizasaun Arte Marsiais, Governante ne’e ko’alia ona ho Ministru Juventude Desportu Arte no Kultura (MJDAK) Nélio Isaac Sarmento no-mos Komisaun Reguladora Arte Marsiais (KRAM), hodi halo reuniaun alargada hodi bele foti desizaun no rekomendasaun ruma husi Governu.
“ Parte ami seguransa nian mak, ami iha hela hanoin ruma, katak ami sei husu organizasaun sira ne’ebé iha ne’e, tenke kontrola sira nia membrus no-mós rezolve sira nia problema ne’ebé mak interna. Tanba ami fó prazu sei fó fulan ida ou fulan rua, se kuandu sira la kontrola sira nia membru hodi rezolve problemas Internas, ami sei rekomenda ba iha Konsellu Ministru, nu’une bele foti desizaun ruma, hodi kria estabilidade paz no hakmatek” dehan Ministru Interiór, Francisco Guterres, hafoin partisipa enkontru Konsellu Ministru extraordinária iha Palásiu Governu, Tersa (29/08/2023).
Iha oportunidade ne’e, ezekutivu ne’e husu Organizasaun Arte Marsiais no Arte Rituais sira atu bele kontrola an, nu’une bele hapara violensia no kria paz hodi kontribui ba estabilidade iha nasaun ida ne’e.
“Hanesan mós Timor oan, apela katak, la presiza uza forsa hodi hapara problema, maibé ho ita nia konsiénsia moral, iha hanoin matenek no aktu toleránsia no respeita malu, sei iha ideia la hanesan presiza koalia didi’ak ba malu no halo diálogu laos uza forsa hodi obriga malu hodi halo problema”, sujere.
Nia salienta liutan katak, Governu sei kontinua halo sensibilizasaun liu hosi Diresaun Nasionál Prevensaun Konflitu Komunitária-DNPKK, ne’ebé tutela iha Ministériu Interior.
“Ita koordena ona ho sira atu halo diálogu ida ho organizasaun sira hodi informa ba sira, saida mak sira presiza halo, nune’e sira bele ajuda kria estabilidade ba rai ida ne’e, se la kria estabilidade mak sei uza forsa hodi bele prevene”, afirma Governante ne’e.
“Ema hotu hakarak povu ne’e hakmatek, iha dezenvolvimentu hodi hetan benefisiu, se wainhira mak kria hela deit problema mak sei la benefisia povu no ba rai ida ne’e”, dehan Ministru.
Antes hakotu Governante ne’e mos husu ba dirijenti Grupu Arte Marsiais (GAM) no Grupu Arte Rituais (GAR) sira atu bele tau matan ba nia membru sira ne’ebé envolve iha problema no respeita mós sirta nia estatutu ne’ebe iha. #
Autor : Abui
Editor : Fatinha
Fotos : AX
