DNPKK DISEMINA PAN 1325 IHA LAÚTEM

LAUTEM, 17 outubru 2023 (SRP)- Ministériu Interiór liu hosi DNPKK (Diresaun Nasionál Prevensaun Konflitu Komunitaria), organiza formasaun ho tema “Diseminasaun Planu Asaun Nasionál (PAN 1325) kona-ba Feto, Pas no Seguransa, ba Lideransa Komunitária no Feto Potensiál Sira”, ba komunidade sira iha Suku Mehara, Postu-Administrativu Tutuala, Munisípiu Lautem.

Reprezentante Diretór Nasionál Prevensaun Konflitu Komunitaria, Evaristo Moniz, hateten nia parte halo atividade ne’e hodi kapasita komunidade sira atu bele entende ho di’ak kona-ba igualdade jeneru iha aspetu feto ba mudansa.

“Objetivu hosi diseminasaun ne’e atu kapasita komunidade sira-nia hanoin no kuñesementu kona-ba Guvernu nia komitmentu adopta rezolusaun Nasoens Unidas PAN 1325 nune’e bele hamenus risku ba feto no labarik feto sira sai vitima ba violensia”, dehan Evaristo iha Suku Mehara, Postu-Administrativu Tutuala, Munisípiu Lautem. Tersa ne’e (17/10).

Tuir nia, programa ne’e importante atu asegura komunidade nia sensibilidade atu mantein seguransa no haburas dame hodi kontribui kontribui ba dezenvolvimentu nasionál.

Administradór Postu- Administrativu Tutuala, Albino Araújo, haktuir diseminasaun ne’e importante tebes atu bele haklean kuñesementu komunidade sira nian.

“Ohin ita ita hasoru malu iha ne’e ha’u hanoin oinsá atu evita konflitu ne’ebé mosu oinsá labele fó presaun ba ita-nia inan-feto sira. Iha ne’e hau atu dehan deit katak ta-nia nasaun mós retifika konvensaun internasionál barak kona-ba feto sira oinsá ita bele fó oportunidade ba feto sira iha área rurál hodi tama iha estrutura polítika nian maibe infelizmente agora dadaun xefe suku feto iha postu ida-ne’e la iha”, esplika Administrador Abilio.

Tuir nia, programa diseminasaun ne’e importante tebes atu bele hakbit komunidade sira iha área rurál nia kuñesementu kona-ba prevensaun konflitu.

“Fó oportunidade ba feto sira atu kompete iha kualker eventu polítika, lideransa suku ka saida de’it agora ita-nia nasaun ne’e feto maka lidera segundu orgaun soberanu iha Parlamentu Nasional agora dadaun feto ida”, fó hanoin.

Lider komunitaria ne’e mós husu atu fahe informasaun hirak ne’e ba komunidade sira seluk iha suku laran nune’e ema hotu bele moris iha paz no estabilidade, iha armonia sosial.

Iha fatin hanesan, Asesora Jéneru DNPKK nian, Iria Mónica Savio, hateten, Guvernu iha komprimisu bo’ot hodi atinje igaulidade jéneru no hakbi’it feto no labarik iha Timor-Leste.#Fatinha