MI HALA’O VIZITA TRABALLU BA KOMANDU PNTL BOBONARO

Bobonaro, 08 outubru 2023 (SRP) – Ministru Interiór, Francisco da Costa Guterres, Ph.D, hamutuk ho Komandante Jerál PNTL, Komisáriu Jerál Henrique da Costa, no tékniku sira hala’o vizita servisu ba Komandu Polísia Nasionál Timor- Leste (PNTL) Munisípiu Bobonaro.

Vizita ne’e ofisiál ne’e ho objetivu atu haree direita ba kondisaun no dezafiu sira ne’ebé membru UPF sira hasoru nune’e Guvernu liuhosi Ministériu Interior bele buka solusaun ba problema hirak ne’ebé Komandu PNTL Bobonaro hasoru.

“Ha’u-nia vizita ida-ne’e mai para atu haree sira-nia kondisoens no ohin aponta ona dezafiu ne’ebé komandu hasoru”, esplika Franciso Guterres, ba jornalista sira iha Komandu PNTL Bobonaro.

Nia dehan, publiku ezije vizilánsia hodi halo prevensaun no fó protesaun ba komunidade maibé presija mós kria kondisaun.

“Ba tinan ida-ne’e ita iha ona planu hodi hari Kuartel PNTL iha munisípiu inklui rehabilitasaun ba Eskuadra sira nune’e bele

fasilita servisu Komandu PNTL hodi halao knaar no servi komunidade sira no halo prevensaun no atuasaun ba konflitu iha Munisípiu Bobonaro tomak”. sublina.

Guvernante ne’e hatutan mós katak, durante nia mandatu, nia sei kontinua kontribui ba instituisaun PNTL nian atu bele sai profisionál liután, hodi serbí interese Nasaun nian tanba PNTL sai pilár fundamentál ida ba estabilidade nasaun nian.

Iha fatin hanesan, Komisáriu Jerál Polísia Henrique da Costa, kongratula polítika hosi Guvernu atu bele moderniza instituisaun PNTL sai diak liután.

“Ida-ne’e hanesan vizita ofisiál hodi haree direta kondisaun Kuartel, instalasaun sira postu UPF no eskuadra PNTL nian, atu haree besik liu problema no difikuldade hirak ne’ebé ita hasoru, ho ida-ne’e kompromisu husi Governu, liuhusi Ministériu Interiór buka atu rezolve dezafiu hirak-ne’e”, dehan Komisáriu Jerál ne’e.

Tuir nia, dezenvolvimentu instituisaun PNTL deskreve ona iha programa prioridade Guvernu nian.

“Ita nia Ministru Interior rasik koalia ona iha publiku kona-ba medida prioritária sira ba dezenvolvimentu sustentavel PNTL nian maka sei foku ba Prevensaun Konflitu, rezolve ita-nia problemas interna no atu hasa’e ita-nia kapasidades atu bele hala’o servisu ho di’ak liután,” dehan lider másimu PNTL ne’e.

Durante halo vizita Komandu PNTL Bobonaro, Ministru ho nia komitiva mós halo vizita ba Kuartel UPF inklui postu seguransa UPF Bora Lolotoe, Gil Dapil/ Mesegel, Auto Lebos, Saburai, Memo, Mota ain-Batugade, Sukaer Midar, Badut Mean, Kaijus Laran, fronteira Nu Laran/ Tunu bibi, no Postu UPF We Fauk. # (Oscar, Elisa).