Dili, 27 jullu 2023 (SRP) Hafoin simu orientasaun hosi Komandu Jerál PNTL, Xefi Servisu Informasaun Polísia (SIP) Nasionál, halo kedas planu operasaun hodi buka tuir no identifika autór sira ba krime públiku hadau telfone ne’ebé mak sempre akontese iha Dili laran.
Iha planu operasaun ne’e ekipa konjunta envolve Aranha Leste, Aranha Oeste, Makikit, Espada (UEP), Forsa Polísia (FP), Unidade Espesiál Falintil (UEF), N2 (Naval-F-FDTL) junta ho SNI (Servisu Nasionál Intelijénsia), servisu loron tomak no konsege asegura joven mane nain-7 iha iha area ne’ebé lahanesan.
Iha operasaun ne’e ekipa konjunta asegura uluk suspeitu JM tinan 17, hela iha Area Bekae, Suku Lahane Osidental, Postu-Administrativu Nain-Feto. Iha prosesu identifikasaun suspeitu koopera diak hodi deklara katak sira hamutuk ho suspeitu seluk ho naran inisiál hanesan PS, ID, AJ, TT, IV, CR, RM, OG, OG, RK, AB, EB, AF, IL inklui DdR alias A nudar autór prinsipál ba kazu hadau telfone iha area Delta no suspeitu sira ne’e inklina an iha grupu 3 ho naran RK (Rabat Kesi), RT (Rabat Tebe) no KKKM (Kaer Kona Kesi Metin).
Rona deklarasaun ne’e ekipa servisu fahe kedas grupu halo vizilánsia totál ba kada suspeitu sira nia uma no fatin konsentrasaun hodi lansa buska no kaptura tan autor sira seluk mak hanesan SMS, iha area Matadouro, Suku Vila-Verde, VBDG iha Suku Santa- Cruz, VBDG iha Audian, Suku Santa-Cruz, FCMX iha Mota Ulun, Suku Becora no-mós YGKS iha Mascarenhas hela iha Suku Lahane Osidental.
Hosi deklarasaun suspeitu hirak ne’e maioria refere ba DdR alias A nudar autór prinsipál mak lidera, nune’e ekipa servisu ba kedas buka tuir maibé suspeitu konsege halai ses hosi nia rezidénsia iha area Tuana-Laran.
Ekipa kontinua servisu makas hodi dezenvolve kazu ne’e liuhosi fontes kredivel no identifika suspeitu nia subar fatin nune’e ekipa konsege asegura DdR iha area Ailok-Laran hamutuk ho evidénsia motór ne’ebé durante ne’e sira uza hodi halo asaun krime.
Hafoin asegura suspeitu hirak ne’e ekipa konjunta entrega kedas suspeitu sira hamutuk ho evidénsia ba Servisu Investigasaun Kriminál (SIK) Komandu PNTL Munisípiu Dili, hodi halo prosesu investigasaun no detein durante 72h tuir lei ne’ebé iha, antes submete ba tribunál hodi tuir porsesu julgamentu, #AX
