Dili, 06 novembru 2023 (SRP) – Ministru Interior (MI), Francisco da Costa Guterres, Ph.D, akompaña husi Komandante Jerál PNTL, Komisáriu Henrique da Costa hala’o lansamentu ba Normas Operasional Padraun (NOP) kona-ba Asediu Seksuál, iha Salaun Auditorium Akademia da Polísia Comoro.
Objetivu husi lansamentu ne’e hodi fahe brosura no livru mata dalan liga ba Normas Operasionál Padraun (NOP) kona-ba Asediu Seksuál iha instituisaun PNTL.
Iha diskursu Ministru Interior, agradese ba inisiativa ida-ne’e kontinua hatudu dixiplina no kombate Asediu seksuál tanba Polísia Nasionál Timór-Leste mak tenke sai modelu ezemplar hodi fó respeitu ba ema nia dignidade umana.
“Hau kontente tebes ho lansamentu ida-ne’e, PNTL nia prezensa sai nudar esperansa ba komunidade sira, tán ne’e imi mak sai modelu exemplar ba dignidade umana hatudu dixiplina no kombate asédiu seksuál ba vida ema nian.”
Aleinde ida-ne’e Ministru Interior kongratula potensia Polísia femenina inklui mós feto Timor-Leste tanba hatudu maturidade dixiplina, servisu ho kuidadu no responsabilidade másimu tebes ba tarefa sira ne’ebé mak sira ezerse.
“Hau kongratula ba servisu ne’ebé mak feto sira halo tanba bainhira imi hala’o servisu sempre halo ho kuidadu, responsivu ho kualidade ne’ebé diak liu, tán ne’e kontinua hatudu imi-nia matenek no mantein imi-nia maturidade no integridade sira.”
Objetu hosi Norma Operasionál Padraun (NOP) hanesan diretiva operasionál atu determina asaun ba kombate no prevene asédiu seksuál ne’ebé prátika husi membru PNTL sira.
NOP ida-ne’e mós regula kona-ba asédiu seksuál hanesan hahalok infrasaun dixiplinar ne’ebé tenke submete autór ba prosesu dixiplinár no aplika sansaun ne’ebé adekuadu.
Aleinde ida-nee prevé mekanizmu hodi garante protesaun vítima no garante kapasidade institusionál hodi simu no prosesa keixa hasoru superiór ierárkiku ne’ebé prátika asédiu seksuál.
Atividade ne’e konta ho prezensa husi 14 komandantes, sarjentus, ofisiais no unidades husi 13 munisípiu, Formadór husi parte Sekretaria Estadu Igualidade, TLPDP, Australian Federal Police, UN WOMEN, estudante estajiariu husi UNDIL.# Fatinha e Eliza.
