Dili, 10 novembru 2023 (SRP) – Iha loron sesta feira ne’e, Ministru Interior, Francisco da Costa Guterres, hetan oportunidade hodi priense iha programa “Meet the Press” edisaun dalimak ho topiku “konseitu seguransa interna”, ne’ebe hala’o iha Auditóriu-PCM, Palásiu Governu, Dili.
Objetivu hosi programa ne’e hodi divulga progresu atinjimentu servisu no programa prioridade Ministeriu Interior nian inklui planu ne’ebé sei implementa iha tinan oin ba jornalista sira inklui media nain sira.
Iha okajiaun ne’e Ministru Interior responde perguntas hosi media sira kona-ba situasaun seguransa rai laran nian ba jornalista sira no elaborasaun ba konseitu integradu Seguransa Nasionál, liuhusi atividade Servisu Sekreta PNTL iha rai laran, infraestrutura ba UPF hodi hatan tuir koordenasaun ba ameasa ho karakterístika ne’ebé identifika ona iha fronteira no-mos bem estar instituisaun PNTL nian.
Governante ne’e fo nia afirmasaun katak objetivu dezenvolvimentu Timor-Leste maka hametin seguransa no estabilidade, no mós harii instituisaun sira husi estadu direitu demokrátiku, no rekuiñese konstrusaun ba dame nu’udar prioridade hodi bele hetan objetivu sira seluk kona-bá dezenvolvimentu no promosaun bein-estár sidadaun Timor-oan sira nian. Orientasaun estratéjika hirak ne’e, reflete kestaun konjunturál ne’ebé iha relasaun ho evolusaun husi dezafiu no ameasa husi kontemporaneidade hodi fo kontribuisaun ba seguransa interna no apoiu ba polítika Estadu nian.
Programa ne’eorganiza hosi Sekretaria Estadu Komunikasaun Sosial (SEKOMS), no hetan prezensa hosi Prezidente Konsellu Imprensa, Prezidente RTTL, Xefi Redasaun hosi Jornal no plataforma online sira hotu. # Bui/Fatinha/Oser.
