Batugade, 18 novembru 2023 (SRP) – Feminina husi Diresaun Jerál Servisu Migrasaun selebra Aniversariu Feto Servisu Migrasaun ba dala 8 ho tema “Hakbit Feto Iha Lideransa ho Kualidade no Sustentanbilidade”. Tema sentral ne’e ho nia objetivu maka atu bele hametin liu tan liña koordenasaun feto no mane servisu iha grupu hodi bele hala’o servisu hamutuk hadi’a sistema kontrolu migrasaun ho profesionalizmu.
Ministru Interiór Francisco da Costa Guterres, Ph.D, iha abertura seremonia ne’e, kongratula feminina migrasaun tomak ne’ebé organiza eventu ne’e ho tema prinsipal ba asuntu igualdade jeneru.
“Ohin ita selebra loron importante ida ne’e ba feto migrasaun tomak entaun hau mai iha ne’e hakarak kongratula feto migrasaun hotu tanba ohin sira halo tinan. Hau hanoin dezenvolvimentu feto nian la limita de’it ba iha área doméstika nian, tanba feto sempre iha papel importante, alem de partisipa ativamente iha karreira iha mos knar domestika ne’ebe sempre rezolve ho ambiente domin nian” hateten Francisco Guterres, iha resintu edifisiu Migrasaun Batugade, (17/11/2023).
Tuir nia, feto lori hanoin sira ne’ebé úniku no importante, perspetiva ho koñesimentu ne’ebé krítiku tebes ba dezenvolvimentu estratéjiku ne’ebe sai fator determinante iha foti desizaun.
“Desde hau nia mandatu nudar Sekretariu Estadu Seguransa hau nia diretor jeral feto ida ne’ebe servisu makas ajuda malu ami reforma setor seguransa. Iha situasaun ne’eba sira rezolve problema barak tanba ema rona liu feto duque mane. Ita konsege promove postu feminina PNTL sira ba deviza superior. Tanba ne’e hau nia mehi ida mak hakarak Komandante Jeral ne’e feto ida. Hau hare atu besik hela ne’e mak imi tenke servisu makas apoia malu sae ba leten”, salienta.
Governante ne’e, enkoraja feminina migrasaun sira atu labele sakrifika an servisu mesak maibe buka halo balansu entre kareira no asuntu familia.
“Susesu presiza feto ho mane iha ekipa ida hodi servisu iha grupu no labele servisu individu. Karik iha dezafiu ruma prontu atu hasoru nafatin dezafiu hirak ne’e labele sai hanesan bareira maibe hanesan oportunidade hodi hakat ba oin. Hau hare Diresaun Geral Servisu Migrasaun feto atinji persentajen diak iha iha nivel foti desijaun, ida ne’e hanesan fiar ida fo ba imi atu muda impresoens barak ajuda estadu promove feto atu bele hola parte iha dezenvolvimentu Timor-Leste nian hahu hosi servisu fatin ba to’e iha sosiedade”, tenik tan.
Iha fatin hanesan Sekrétaria Estadu ba Igualdade (SEI), Elvina Sousa Carvalho, hateten selebrasaun ne’e atu valoriza feto migrasaun sira ne’ebe dedika na ba estadu ida ne’e.
“Hato’o parabens ba feminina Migrasaun sira ne’ebe ohin halo tinan ba dala 8, hau bele dehan katak feto ne’ebe tau farda sira ne’ebe mak brani hamrik iha fileira oin hodi sai ezemplar ba iha instituisaun sira seluk. Selebrasaun ne’e atu valoriza no fo onra ba feto migrasaun sira ne’ebe kontribui ba rai ida ne’e tanba imi nia kontribuisaun iha portaun entrada nasaun nian importante tebes”, dehan eis deputada komisaun B ne’e.
Elvina Sousa Carvalho garante katak nia parte sei rekomenda ba linhas ministeiras sira hotu atu wainhira halo programa konsidera mos asuntu igualdade jeneru iha planu sira.
Entretantu Diretora Jeral Servisu Migrasaun, Inspetora Xefi Polisia, Adelaide da Rosa, hateten feminina migrasaun hari iha tinan 8 kotuk ba ho inisiativa atu valoriza no motiva diak liutan feminine sira nia servisu.
“Estabelesementu Grupo Feminina Servisu Migrasaun hari iha 21 novembru 2015 ne’ebe inisia husi Eis Adjuntu Diretor Jeral Servisu Migrasaun, atual Xefi Gabinete Komandante Jeral PNTL, hetan aprovasaun hosi Eis DGSM Superintendente Boavida Ribeiro atual Diretor SIP Nasional no-mos Eis Diretora Geral Guilhermina Ribeiro, atual hanesan Prezidente Autoridade Munisipiu Dili ne’ebe momentu ne’eba hanesan konseleiru ba grupo ida ne’e”, dehan Adelaide.
Nia hateten, kada tinan tinan sempre organiza atividades oi-oin hodi selebra aniversariu no atividade sira maka hanesan desportu, kadi kakutak, seminariu, no seluk tan ne’ebe relasiona ho hakbit feto sira hodi lidera ho kualidade no sustentavel.
“Hau hakarak hato’o apresiasaun no agradesementu ba Guvernu liu husi Ministru Interior, ne’ebe mak fo konfiansa ba feto hodi lidera no foti desijaun iha Diresaun Jeral Servisu Migrasaun no-mos primeira vez iha istoria Diresaun Jeral servisu Migrasaun lidera husi feto ida depois tinan 20 nia laran”, afirma.
Iha biban ne’e Adelaide enkoraja nafatin nia membru hotu, atu servisu no serve ho laran hala’o atendementu ho profisional hodi nune’e atinje objetivu Diresaun ida ne’e nian no fo apoio masimu ba programa IX Guvernu konstitusional tuir knaar no misaun ne’ebe mak atribui ona.
“Ohin ita hala’o serimonia simples ida ne’e hanesan meius aprosimasaun no-mos agradesementu ida, ne’ebe mak Diresaun Jeral Servisu Migrasaun halo hodi hametin relasaun ho parte kompetentes hanesan Ekipa Integradu Fronteira ne’ebe forte no sempre hala’o serbisu apoio malu. Hanesan lideransa iha diresaun ida ne’e, hau apresia ba membru servisu migrasaun hotu nia servisu no apoio masimu ba hau nia lideransa durante tinan 2 hanesan Adjuntu Diretor Jeral no fulan 8 hanesan Diretor Jeral”, subliña.
“Iha oportunidane ne’e hau hato’o agradesementu wain Sua Exelensia Ministru Interior hanesan lideransa masimu iha Ministeriu, Sekretario Estadu Protesaun Sivil, Sekretaria Estadu Igualidade no inkluzaun, Komandante Jeral PNTL reprezentante Komandante Unidade Patrullamentu Fronteira (UPF), Diretores Jeral no Nasional sira iha Ministeriu Interior, Xefi Departementu, Assesores, Xefi Sektores, Adidus sira, membru imigrasaun mane sira ne’ebe fo apoio direita no indireita em termos de koordenasaun servisu no-mos parseiru servisu sira”, tenik tan.
Serimonia ne’e hetan partisipasaun hosi, Sekretariu Estadu Protesaun Sivíl, Domingos Mariano Reis, Diretór Jerál Seguransa no Prevensaun Konflitus, Gaspar Pereira de Sousa, Diretór Jerál Administrasaun Finansas, Mariano de Araujo, Komandante UPF, Euclides Belo, Diretor Jeral, Servisu, Konsul Kupang no Asistensia teknika Atambua, Xefi Migrasaun, Alfandega no Quarantena PLBN Mota ain, Mota Masin,Wini, Napan, Haumeni Ana no Oepoli, Autoridade lokal no lider relijioju no-mos estudante sira hosi UNDANA ne’ebe halo estajiu iha Postu Integradu Fronteira Timor-Leste nian. #(Oscar/Elisa/AX)
