Dili, 20 novembru 2023 (SRP) –Ministru Interior, Francisco da Costa Guterres, Ph.D, akompaña husi Inspetora Gabinete Inspesaun no Auditoria, Candida do Rosario da Costa Soares hala’o primeiru enkontru ho funsionáriu sira, iha salaun enkontru Servisu Migrasaun.
Objetivu husi enkontru ne’e hodi rona orientasaun servisu bazeia ba dekretu lei númeru 73/2023, 14 setembru liga ba orgánika Ministériu Interior nian tuir artigu 28 ne’ebé ho nia kompetensia no funsionamentu servisu fiskalizasaun no auditoria.
Iha enkontru ne’e, Ministru Interior kongratula Inspetora inklui funsionáriu sira no nia husu labele pesimista tanba Gabinete Inspesaun no Auditoria hanesan parte integrante, elementu prinsipál ba dezenvolvimentu estadu no nasaun ida-ne’e.
“Imi hanesan pesa importante no prinsipál ba dezenvolmentu estadu no rai ida-ne’e, labele pesimista kontinua lao ba oin hatudu imi-nia integridade no profesionalizmu .”
Governante ne’e kontinua husu ba funsionáriu sira kontribui ba estadu no labele ezije demais ba estadu, maibé saida mak imi bele halo ba estadu ida-nee, “imi-nia kontribuisaun liu husi imi-nia servisu, imi-nia integridade, profesionalizmu mak fó impaktu ba dezenvolvimentu estadu, lao tuir regras no prosedimentus.”
Iha fatin hanesan, orgaun superiór administrasaun públika ne’e ezije ba funsionáriu sira tenke hatudu responsabilidade, hatutan esperiénsia, dudu servisu ba oin, no sai investigadór kualitativu no kuantitativu no asegura servisu ho sijilu.
Governante IX governu konstitusionál ne’e kontinua ezije ba funsionáriu sira tenke dixiplina, respeita ierarkia no la tolera pratika asédiu seksuál iha sevisu fatin no hatudu indikadores performance pozitivu no tenke respeita ordem ierárkia.
“Funsionáriu sira tenke respeita ierárkia, hatudu dixiplina no la tolera prátika asédiu seksuál iha servisu fatin, presija kumpri no hala’o ordem husi birokrata sira, ida-idak responsabiliza ba servisu no buka aprende husi seniór sira no respeita malu”.
Ikusliu, governante ne’e bolu atensaun ba funsionáriu sira evita kesar malu, haklalak malu, konta malu, lao ba mai, karik iha diferensia ideia bolu malu koalia ho ulun malirin, respeita no valoriza sub-ordinadu sira- nia servisu, karik servisu laiha buka lee no aprende barak husi senior sira, ho nune’e ita hotu hamutuk fó kontribuisaun ba estadu liuhusi prestasaun no dedikasaun servisu no tenke sai exemplar ba ema seluk.
Iha fatin hanesan, Inspetora Gabinete Inspesaun no Auditoria aprezenta ba Ministru Interior kona-ba servisu sira ne’ebé lao hela no sira ne’ebé sei hala’o iha fulan ida-nee, tuir orientasaun sira ne’ebé regula iha orgánika ministériu interior inklui planu prioridade sira ne’ebé planea ona.
Enkontru ne’e konta ho prezensa husi kargu diresaun no xefia sira funsionáriu sub-ordinadu husi Gabinete Inspesaun no Auditoria inklui asesora nasionál. #Fatinha ho Alu.
