Dili, 21 novembru 2023 (SRP) – Tersa feira ne’e, Ministru Interiór (MI), Francisco da Costa Guterres, Ph.D, partisipa reuniaun Konsellu Ministru (KM) extraordinaria, hamutuk ho membru IX Guvernu Konstitusionál, ne’ebé prejidi husi Primeiru-Ministru (PM) Kay Rala Xanana Gusmão, iha sala reuniaun Konsellu Ministru Palásiu Governu.
Iha enkontru ne’e Konsellu Ministrus aprova ona projetu Proposta Lei Orsamentu Jeral Estadu (OJE) ba tinan 2024, ne’ebé aprezenta husi Ministra Finansas, Santina José Rodrigues F. Viegas Cardoso, ho valór totál konsolidadu millaun rihun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál. Valór ida ne’e inklui dotasaun millaun rihun US$ 1,83 ba administrasaun sentrál no millaun US$ 60 uza ba RAEOA.
Hosi montante totál despeza ne’ebé prevee ba Administrasaun Sentrál no RAEOA, millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.
Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6.
Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas. #REMATA
http://timor-leste.gov.tl/?p=35151&lang=tp
