Atabae, 26 novembru 2023 (SRP) – Ministru Interior, Francisco da Costa Guterres, Ph.D, akompaña Ministru Defeza, Kontra – almirante ‘CMD’ Donaciano Costa Gomes “Pedro Klamar Fuik” Ph.D, halo palestra ba mediador sira ne’ebe tuir formasaun hodi haklean liutan sira nia koñesementu konaba prevensaun konflitu komunitaria.
Klamar fuik hateten palestra ne’e atu loke joventude sira nia hanoin nune’e sira iha vizaun ne’ebe luan laos hare deit ba misaun mediador nian maibe hanoin oinsa presiza iha relasaun diak ho komunidade no autoridade seguransa sira iha baze, tanba seguransa laos iha deit PNTL no F-FDTL nia liman. Nia hato’o asuntu ne’e liu husi palestra iha Sentru Treinamentu 1° Sarjentu Aquilis da Silva Rairobo, Postu-Administrativu Atabae, Munisipiu Bobonaro, domingu (26/11/2023).
Durante halo aprezentasaun, mediador sira partisipa masimu iha palestra ne’ebe maka halao durante oras rua nia laran nian, no sira iha interese maka atu aprende hodi aprofunda sira nia kuñesementu. # (Elisa, AX).
