Atabae, 28 novembru 2023 (SRP)-liuhusi diresaun nasionál prevensaun konflitu Komunitáriu (DNPKK), husi Munisipiu sanulu resin rua inklui Rejiaun Administrativa Espesiál Oe-Cusse Ambeno (RAEOA) ne’ebé hala’o Komemorasaun 48 Aniversáriu Proklamasaun Repúblika Demokrátika Timor-Leste, iha postu Administrativu Atabae, Munisípiu Bobonaro.
Partisipa iha selebrasaun ne’e husi Asesor Ministeriu Interior Komisaun Organizadora no DNSPP ba iha komemorasaun 28 novembru 2023 hodi rona mensajen husi Prezidente Repúblika Demokrátika Timor-Leste nian.
Diskursu husi S. Exa. Prezidente Repúblika nian Ita komemora ohin loron, aniversáriu 48 Ba Proklamasaun Unilaterál ba Repúblika Demokrática Timor-Leste nian. Liu kuaze meiu sékulu, oan sira husi rai ida ne’e, ne’ebé impulsionadu ho hakarak ba autodeterminasaun no independénsia, hasa’e sira nia lian hamutuk, proklama soberania nasaun nian.
Ohin, ita la’ós fó-hatene de’it momentu históriku ida ne’e, maibé mós haree ba futuru ho responsabilidade atu kria dalan foun ba independensia iha área hotu-hotu. Iha agrikultura, ita konvokadu atu emanisipa-an husi limitasaun, dedika-an ba prátika sustentável no inovasaun teknolojiku. Rai ne’ebé ita kuda la’os deit rai-isin, maibé ita nia fundasaun ba seguransa alimentar no prosperidade ekonómika. Hanesan mós, ita nia tasi no ai-laran ezije gestaun saudável no ekilibradu, atu prezerva rikeza naturál ne’ebé ita erda. Esforsu atu hetan independensia iha indústria no iha enerjia, importante tebes.
Ita tenki aproveita enerjia verde no renovável, la’os de’it hanesan kompromisu ambientál ida, maibé mós hanesan estratéjia ba emponderamentu enerjėtiku. Rekursu petróleu no minerál ne’ebé ita iha, dádiva husi rai laran, tenki esplora no transforma ho modu sustentável, hodi garante benefisiu ne’ebé duradouru ba ita nia povu. Bee, essénsia ba moris, tenki jere ho sabedoria. Ita nia independénsia seidauk kompleta, se ita la bele fo garantia ba asesu justu no sustentável ba bee ba ema hotu-hotu. Ne’e desafiu ida ne’ebé ita envolve-an ho determinasaun, rekoñese katak jestaun efisiente ba rekursu ida ne’e mak pré-rekijitu ida ba ita nia dezenvolvimentu. Aleinde ida ne’ebé, wainhira ita avansa tuir diresaun ba adezaun Asosiasaun Nasoens Sudeste Aziátiku (ASEAN) no Organizasaun Mundiál Komérsiu (OMK), ita iha fronteira foun ba independensia – integrasaun rejionál.
Ita tenki pozisiona-an atu sai membru ativu iha komunidade globál, kompartilla no absorve koñesimentu, partisipa iha parceiru estratéjiku no konstrui ponte sira ne’ebé liga ita ho mundu. Maibé, essénsia loloos husi proklamasaun foun independénsia mak iha juventude – forsa vital ne’ebé sei hametin futuru ita nian. Ita herdeiru husi legadu ne’ebé konstrui husi juventude sira iha tempu uluk, no agora, iha mundu ne’ebé dinamiku no komplikadu, responsabilidade lideransa iha jerasaun foun sira nia liman. Imi mak arkitetu ba loron oin mai, ne’ebé sai matadalan husi konhesimentu tékniku no siénsia ne’ebé sei forma tranzisaun enerjétiku, sei loke odamatan ba kooperasaun ekonómiku sustentável no sei explora oportunidade sira ne’ebé boot ne’ebé aprezenta iha ita nia oin. Dezempregu no inseguransa alimentar, ne’ebé agrava iha periodu pandemia COVID-19 nian, impoin hanesan obstákulu signifikativu. Impaktu globál husi pandemia ne’e afeta la’os saúde públika de’it, maibė mós estabilidade ekonómiku.
Aleinde ida ne’e, funu iha Ukraina no presaun inflasionáriu ne’ebé sai kausa ba ida ne’e kontribui ba volatilidade presu no distribuisaun ba bens esensiál sira, halo ita nia luta kontra pobreza sai komplikadu liu tan. Ita tenki adota abordajen abrangente no inkluzivu. Investimentu iha edukasaun mak investimentu iha futuru. Ita tenki garante katak labarik hotu-hotu iha asesu ba edukasaun ne’ebé ho kualidade, kapasita sira atu hasoru dezafiu sekulu XXI no kontribui ba dezenvolvimentu sustentável.
Subnutrisaun inan ho oan mak barreira ne’ebé signifikativa ba progresu. Ita presija implementa polítika no programa ne’ebé garante seguransa alimentár, hodi insentiva prátika agrikola sustentável no promove asesu ba ai-han nutritivu. Kria oportunidade empregu, liuliu ba juventude sira, ne’e fundamental atu garante tranzisaun jerasionál ne’ebé la’o di’ak no haforsa baze dezenvolvimentu. Apoiu ba empreendedorismu, promosaun setór estratégiku no dezenvolvimentu kapasidade sira mak xave ba prosesu hirak ne’e. Distintu konvidadu sira, atu Kumpri Objetivu Dezenvolvimentu Sustentável (ODS) mak jornada Ida ne’ebé refleta ita nia kompromisu la’os de’it ho ita nia povo rasik, maibé ho komunidade globál.
Ita determinadu los atu aborda kestaun krusial sira, hanesan erradikasaun pobreza, promosaun ba igualdade jéneru, garante asesu ba edukasaun no saúde ne’ebé ho kualidade, no konstrusaun ba sidadaun no dezenvolvimentu sustentável. Atu kumpri ho esperansa no obrigasaun husi ASEAN, ita presiza reforsa ita nia infraestrutura. Konstrusaun ba instalasaun sira ne’ebé bele simu dignitáriu, delegasaun no espesialista sira mak esensiál. Melloria ida ne’e la’os de’it hadi’a kapasidade ita nian ba servisu no hospitalidade, maibé mós lha implikasaun positivu ba setór servisu sira, inklui hotél, restaurante, transporte no komunikasaun.
Konstrusaun ba Timor-Leste ne’ebe integradu iha komunidade internasionál presiza investementu iha infraestrutura digitál, telekomunikasaun efisiente no servisu transporte modernu. Konektividade la’os de’it asuntu konveniénsia, maibé mós nesesidade ba partisipasaun ativa iha organizasaun internasionál. Distintu konvidadu sira, se bele, ha’u hakarak remata liafuan badak ne’e ho nota agradesimentu ida ba prezensa husi altu dignitáriu internasionál ida ne’ebé ohin onra ita ho nia ilustre prezensa: Prezidente Guiné-Bissau nian: Primeiru, ha’u hakarak hato’o ha’u nia gratidaun ba prezensa ilustre husi Señor Umaro Embaló, Prezidente Guiné-Bissau, hanesan Konvidadu Honra iha Selebrasaun Timor-Leste nian. Ne’e hanesan onra ida mai ha’u no povu Timor-Leste atu simu Exeléncia iha ita nia rain la’os de’it hanesan belun, maibé mós hanesan reprezentante fraternál husi ita nia maun alin no inan feto sira Guiné-Bissau nian.
Ha’u aproveita oportunidade atu estende votu no felisitasaun ne’ebé sinseru ba povu nobre Guiné- Bissau ba Komemorasaun ba 50º Aniversáriu Independensia Nasionál Guiné-Bissau nian, ne’ebé selebra iha loron 24 Setembru 2023. Ha’u hanoin ho respeitu ba proklamasaun unilaterál ba feitu históriku ida ne’e no aprovasaun ba Konstituisaun Repúblika nian ne’ebé primeiru nia desizaun deliberada husi Assembleia Nasionál Popular, ne’ebé halibur iha Matas de Madina de Boé. Selebrasaun sira ne’e la’os de’it omenajen ba Aman Fundadór Nasionál Guiné-Bissau nian, inklui Lider Saudosu ba Luta Armada, Señor Amilcar Cabral, maibé mós destaka prosesu libertadór ne’ebé inspira Proklamasaun Independénsia Nasionál Timor-Leste nian iha loron 28 Novembru 1975.
Ha’u labele mensiona ho gratidaun misaun nobre ha’u nian hanesan Reprezentante Espesiál husi Sekretáriu-Jerál Nasoens Unidas nian iha Misáun UNIOGBIS. Ha’u rai ho apresiasaun boot iha ha’u nia laran memória sira ne’ebé di’ak husi povu Timor-Leste nian, espesialmente perkursu ne’ebé ha’u halo iha rai laran tomak iha tempu fulan 18 iha misaun ha’u nian. Ha’u mós hakarak aborda pontu tolu ne’ebé esensiál iha konjuntura internasionál, ne’ebé sai hanesan dezafiu verídiku ba komunidade internasionál, espesialmente ba sira ne’ebé partilha ita-nia ideál sira ba liberdade, independensia, Estadu Direitu, Demokrasia no soberania, ne’ebé ita selebra iha momentu ne’e: Primeiru, kondena konflitu armadu iha Faixa de Gaza. Iha loron 07 fulan Outubru 2023, durante atake surpreza ne’ebé halo husi forsa militár Hamas nian neʼebé kontrola Faixa de Gaza, halo raptu sidedaun israelita liu 200, inklui sidedaun sivil no militár ho idade oioin no sidadaun Israelita liu 1,200 hetan oho, asaun ida ne’ebé konstitui krime grave iha termus Direitu internasionál. Justifikadu husi direitu autodefesa, Governu Israel hahú operasaun militár neʼebé laiha presedente no intensifika blokeiu ba área teritoriu ne’e, interrompe komunikasaun no taka netik asesu ba reabastesimentu ba área teritoriu, ho impaktu humanitáriu ne’ebé aumenta.
Timor-Leste kondena forte krime agresaun ba Estadu Israel no krime sekuestru ho masakre ba sidadaun sivil ne’ebé labele defende-an. Maibé krime agresaun ba Estadu Israel ne’ebé halo husi forsa militár Hamas nian, la justifika krime seluk hanesan agresaun ba populasaun sivil ne’ebé labele defende-an, taka no impede asesu ba medikamentu, produtu allementar no produtu esensiál sira ba sobrevivénsia populasaun, la justifika destruisaun infraestrutura sivil ne’ebé jeraliza no aumenta drama humanitáriu no sosiál ne’ebé akontese iha área teritóriu ne’e.Autoridade Hamas nian halo krime grave no desprezivel, maibé resposta Israel nian demais liu tan no halo autoridade Israel nian responsável ba vítima rihun ba rihun husi sivil (14,758 husi Palestina) no potensialmente responsável ba krime kontra Umanidade.Tanba ne’e, ami apela ba sesarfogu imediatu no labele demora iha libertasaun ba dalan fornesimentu no apoiu humanitáriu, atu ajuda vítima sivil sira ne’ebé ami kondeena forte iha konflitu ne’e Segundu, kondena konflitu armadu iha Ukraina: Agresaun Rúsla ba Ukraina, kompleta iha 2024, tinan rua konfiitu armadu laiha interrupsaun.
Timor-Leste kontinua solidáriu ho Povu no Governu Ukraina nian, tanba agresaun armadu ida ne’e hanesan violasaun momos ba direitu internasionál no Karta Nasaun Unidas nian. Konflitu ne’ebé destrui infraestrutura Estadu Soberanu no Independente ida nian, ho prejuizu ekonómiku no sosiál ne’ebé barak-líu, iha ne’ebé soma vítima sivil inosente no resulta iha eksodu ba ema refujiadu sira tokon ba tokon Konflitu ne’ebé, maske lokalizadu iha Europa, afeta negativamente nasaun hotu iha Mundu, laiha exesaun, kria prizaun inflasíonáriu ba produtu aliementar no produtu esensiál sira, ho impaktu negativu barak-liu ba nasaun sira ne’ebé frájil, kiak liu no menus dezenvolvidu, hodi agrava situasaun pobreza, subnutrisaun maternu-infantil no inseguransa alimentár, ne’ebé registadu iha nasaun sira ne’ebé menus riku hanesan Timor-Leste Terseiru, kondena situasaun iha Myanmar.
Ami kontinua solidáriu ho Povu no Governu Unidade Nasionál (NUG) Repúblika Uniaun Myanmar nian, espesialmente ho drama ne’ebé komunidade Rohingya nian hasoru.Ami kontinua konsidera NUG, iha termus Direitu Internasionál, hanesan “governu iha ezíliu” ne’ebé agrupa iha komité reprezentante sira husi Governu no Parlamentu Nasionál Myanmar nian neʼebé eleitu legiítimamente iha eleisaun loron 08 fulan Novembru 2020, iha ne’ebé destaka lideransa 5. Exa. Konselleira Estadu no Laureada Nobel Paz, Senhora Aung San Suu Kyi. Atu dehan tan katak sitadu, “governu iha ezíliu” ne’ebé reúne membru sira husi partidu oposisaun neʼebé eleitu ho demokrasia ba Parlamentu, ne’ebé fó ba nia legitimidade akresida no reprezentativu ba setór sira oioin iha sosiedade Myanmar nian.
Nune’e ami kontinua kondena golpe militar ne’ebé akontese iha loron 01 fulan Fevereiru 2021, no ami apela ba Junta Militar atu hahu konsidera legalidade konstitusionál no respeita liberdade no direitu fundamentaál, espesiálmente tuir pontu lima neʼebé ASEAN defini hanesan konsensu. Konklusaun, husi inisiu konfiitu armadu iha Faixa de Gaza, ne’ebé hahu iha loron 07 fulan Outubru 2023, no tuir operasaun militár ne’ebé la’o hela ne’ebé halo husi autoridade Israel nian, Nasoens Unidas, liuhusi sira nia ajénsia espesializadu no liuhusi sira nia Sekretáriu-Jerál, denunsia sequestru no masakre ba sidadaun sivil Israel nian, no reivindika libertasaun ba reféns, maibé moós toma pozisaun kontra blokeiu ba Faixa de Gaza, ho proibisaun ba reabastecimentu ba produtu no bens esensiál sira.
Sekeretáriu-Jerál mós denúnsia violénsia kombate sira nian, espesialmente iha alvu sivil ne’ebé la’ós militár ho rejistu vítima sivil ne’ebé barak-liu, la’ós armadu, inklui labarik, feto no idosu ne’ebé inosente. Kritika kontra Sekretáriu-Jerál Nasoens Unidas nian la’ós justu no mós demonstra arrogánsia ne’ebé boot, bainhira exije demisaun ne’ebé la’ós justifikadu, la haree ba gravidade oksorrénsias ne’ebé ita asiste lorloron iha media sosiál. La’ós justu no lahatene fo obrigadu ba Sekretáriu-Jerál Nasaun Unidas nian ne’ebé, husi inisiu, luta ba kauza dame, direitu umanu no dezenvolvimentu sustentável iha eskala global. Timor-Leste solidáriu ho Sekretáriu-Jerál Nasoens Unidas nian.
Obrigadu barak. Maromak haraik nia bensa ba ita hotu#Liza
