Baucau, 28 dezembru 2023 (SRP) – Ministériu Interiór hamutuk liuhosi DNPKK (Diresaun Nasionál Prevensaun Konflitu Komunitaria) fasilita formasaun kona-ba lideransa transformativa, prevensaun rezolusaun konflitu no mediasaun sensivél ba jéneru ba Korpu Bombeiro, Corpo Seguransa Sivíl, no-mós mediadór sira iha Munisípiu Baucau.
“Ita hotu iha ne’e hakarak komunidade iha Baucau ne’e moris iha paz tanba ne’e tenke iha karater lideransa ne’ebé diak. Mai ita hamutuk nafatin maske ami-nia tempu ne’e atu remata ona maibé nudar Baucau oan sempre kontribui saida mak bele halo iha rai Baucau atu sai diak liután hodi kontribui ba paz”, hateten Administradór Incencinio, iha Aldeia Betulale, Suku Trilolo, Postu Administrativu Baucau Vila, Munisípiu Baucau.
Nia dehan, lideransa ne’e hanesan jornada ida ne’ebé importante tebes, laos atu buka pozisaun maibé tenke sai hanesan ispellu ba ema seluk atu banati tuir saida maka ita halo.
“Konflitu ne’e kategoria ba direta no indireta no nia hun mai hosi ita-nia an rasik. Nia hun maka ita-nia isin lolon hanesan matan, ibun, tilun no ita -nia asaun maka liman no ain. Rona deit husu tuir lai selae koalia ibun lasukat maka liman no ain bele kria konflitu”, salienta.
“Agradese wain ba ekipa hosi Ministériu Interior ne’ebé iha oportunidade diak mai iha ne’e hodi fó rezolusaun alternativa ida atu redus konflitu, pelumenus ho formasaun ne’e ita bele domina an ita atu prevene konflitu”, subliña.
Formandu sira partisipa formasaun kona-ba lideransa transformativa prevensaun rezolusaun iha munisípiu Baucau
Entretantu, Diretora Lidia Lopes de Carvalho, hateten formasaun ne’e espesiál liu ba funsionáriu Ministériu Interior sira ne’ebé hala’o knar iha Munisípiu Baucau.
“Ohin ita halao formasaun kona-ba lideransa ne’ebé hala’o ona iha munsípiu hotu no ida-ne’e ba dala ikus iha Munisípiu Baucau. Objetivu hosi formasaun ida-ne’e atu kapasita funsionáriu Ministériu Interior hirak hanesan Autoridade Protesaun Sivíl, Bombeiros, DNSPP no DNPKK sira-nia hanoin no kuñesementu kona-ba lideransa estratéjiku no jestaun liu-liu atu prevene konflitu iha Munisípiu Baucau”, dehan Diretora Lidia.
Tuir nia, Lideransa laos atu buka pozisaun maibé tenke sai hanesan ispellu ba ema seluk atu banati tuir maibé persija prepara an tanba kaer ona posizaun ne’e hanesan konfiansa ida ne’ebé depozita hodi presta responsabilidade.
“Materia kona-ba lideransa transformativa, prevensaun konflitu no mediasaun sei fasilita hosi DNPKK no-mos parseria lokál sira hosi sosiedade sivíl BELUN durante loron rua nia laran. Ho formasaun ne’e espera sei ajuda ita ita bo’ot sira atu servisu ho diak iha terenu nune Baucau bele moris iha ambiente paz nune’e dezenvolimentu bele lao ho diak”, hakotu. # (Elisa/AX)
