Dili, 19 janeiru 2024 (SRP) – Ministru Interiór, Francisco da Costa Guterres, Ph.D, hamutuk ho estrutura tomak husi Diresaun Sivíl inklui unidade sira husi Polísia Nasionál Timor-Leste hala’o limpeza jerál iha area Branka hodi hamoos foer ne’ebé mak afeitadu husi inundasaun iha loron hirak liuba.
Atividade ne’e hala’o husi Ministru Interior ho funsionáriu sira hodi hamoos foer sira ne’ebé mak botuk hamutuk iha tasi ninin hanesan ai-rohan, ai-tahan, plástiku, lata mamuk. Iha fatin hanesan governante ho funsionáriu sira suru sai rai uut sira ne’ebé taka metin iha valeta no estrada ninin inklui fase estrada ne’ebé nakonu ho rai rahun.
Ambiente ne’ebé moos mak sidadaun hotu-hotu nia mehi, maibé la bele hela ho mehi deit tenke kuda iha prátika no hadomi ambiente hodi la soe foer arbiru.
Funsionáriu sira foti foer ne’ebé rekolla ona husi iha area Branka
Inundasaun mak impaktu ida husi ambiente ne’ebé la moos, tanba kauza hosi soe fo’er arbiru, fo’er barak mak naklekar iha fatin hotu tanba kauza husi ema nia hahalok, tan ne’e, bainhira udan tun, bee sei dada fo’er sira-ne’e ba mota laran hodi suli ba tasi hodi hafoer tasi nia furak.
Atividades limpeza jerál ne’e partisipa husi Gabinete Ministru Interior, Diresaun Jerál Administrasaun no Finansas, Korpu Bombeiros, ekipa Autoridade Protesaun Sivíl, Diresaun Nasionál Patrimóniu Públiku, Diresaun Jerál Servisu Migrasaun, Unidade Polísia Marítima, Unidade Tránzitu no Servisu Nasionál Inteléjensia. # Ekipa Media-MI
