Dili, 23 janeiru 2024 (SRP) – Ministru Interior, Francisco da Costa Guterres, Ph.D, hamutuk ho Diretór Jerál Seguransa Prevensaun Konflitu Gaspar de Sousa, hala’o enkontru ho Sekretária Estadu ba Igualdade (SEI), Elvina Sousa Carvalho, hodi ko’alia kona-ba polítika Governu atu hasa’e partisipasaun feto iha pozisaun feto nia lideransa liu-liu iha instituisaun PNTL (Polísia Nasionál Timor-Leste).
Sekretária Estadu ba Igualdade, rasik sai nudar parseria importante ida ba Ministériu Interiór durante ne’e, hodi asume papel importante tulun hodi hasa’e no promove partisipasaun feto ne’ebé iguál no inkluzivu liu-liu hasa’e kuota partisipasaun feto iha rekrutamentu foun PNTL nian to’o 30% no asegura feto, liu- liu feto foinsa’e sira hodi asesu ba informasaun kona-ba kritériu sira iha nivel nasionál no munisípiu sira.
Ministru Interior foto hamutuk ho SEI iha Gabinete MI
Relembra fali katak, desde inísiu rekrutamentu iha Rejime Konkursu Públiku ba PNTL ne’e hateten kedas, kada rekrutamentu tenke koloka 15% husi feto, maibé persentajen ida-ne’e iha kada rekrutamentu la atinji númeru ida-ne’e. Entaun presija tebes polítika no regulamentu sira ne’ebé mak reflete igualdade jéneru hodi promove no proteje feto sira iha éra dezenvolvimentu nasionál.
Entretantu enkontru ne’ebé hala’o iha Ministériu Interior ne’e hetan akompañamentu hosi Xefi Gabinete Ministériu Interior, Paul de Assis Belo, Asesora Komunikasaun Sosiál, Dionisia Sávio, reprezentante Diretora Nasionál Prevensaun Konflitu Komunitaria, Evaristo Moniz, no-mós asesór nasionais sira hosi SEI nian. # (Bui/AX).
