GOVERNU HO SOSIEDADE SIVÍL KONTINUA DESKUTI REDE NASIONÁL PREVENSAUN KONFLITU

DILI-08 fevereiru 2024 (SRP)-Ministériu Interior liuhosi Servisu Diresaun Jerál Prevensaun Konflitus ho liñas ministeriais, inklui sosiedade sivíl no parte igreja, kontinua halo diskusaun kona-ba Rede Nasionál ba prevensaun konflitu, iha salaun Koffe Annan Caicoli.

Diretora Nasionál Prevensaun Konflitu Komunitaria, Lidia Lopes de Carvalho haktuir objetivu husi sorumutu ida-ne’e maka atu aliña inisiativas no plataforma koordenasaun hodi fó apoiu implementasaun ba programa Rede Nasionál ba prevensaun konflitu.

Objetivu hosi enkontru ne’e, atu fasilita plataforma koordensaun nasionál entre organizasaun ka instituisaun relevante sira, atu asegura kolaborasaun no fó apoiu ba governu Timor-Leste, liuhusi dezenvolvimentu ba implementasaun programa setór seguransa nian, liuliu ba polítika prevensaun Konflitu iha komunidade.

Aleinde ida-ne’e, enkontru ne’e hodi haree mós kona-ba planu no estratéjia ne’ebé komprensivu oinsá atu promove paz, estabilidade no sustentabilidade iha komunidade nia leet.

Diskusaun Rede Nasionál ba Prevensaun ne’e ho misaun atu halibur no fahe informasaun, no halo análize ba informasaun relevante sira (inklui análize jéneru no protesaun), no servisu hamutuk ho parseiru sira hosi ajénsia governu no NGO sira, atu dezenvolve no implementa estratéjia no intervensaun apropriadu sira hodi prevene konflitu, no hamenus impaktu konflitu sira, tuir padraun ne’ebé estabelese.

Entertantu, iha diskusaun refere, hetan partisipasaun husi autoridade lokál, parte igreja, sosiedade sivíl, UN-woman, CNC, CNJTL, RENETIL, Sefope, Moffe-TL, no mós asesór sira husi Ministériu Interior inklui membru PNTL. # Charlie-Rival.