𝐌𝐈 𝐇𝐔𝐒𝐔 𝐊𝐎𝐌𝐀𝐍𝐃𝐔 𝐏𝐍𝐓𝐋 𝐌𝐔𝐍𝐈𝐒𝐈𝐏𝐈𝐔 𝐋𝐀𝐔𝐓𝐄𝐌 𝐊𝐔𝐌𝐏𝐑𝐈 𝐄𝐒𝐓𝐀𝐓𝐔𝐓𝐔 𝐍𝐄’𝐄𝐁𝐄 𝐈𝐇𝐀 𝐎𝐍𝐀

Lautem, 07 fevereiru 2025 (SRP) – Ministru Interior Francisco da Costa Guterres, Ph.D, hamutuk ho Segundu Komandante Jeral PNTL, Komisariu Polisia Pedro Belo, hala’o vizita servisu ba Komando PNTL Munisipiu Lautem, hodi hare besik liutan kondisaun ne’ebe membru sira enfrenta no analiza problemas hirak ne’ebe iha, ho nune’e, Governu liu husi Ministeriu Interior bele iha kbiit atu buka solusaun ne’ebe Komandu PNTL Lautem hasoru.

“Ohin ha’u mai para ita atu koalia no informa mos ba ita boot sira saida mak ami halo ona, ita sei enkontru ha’u sei esplika detallu kona-ba saida mak ita halo hodi responde ba kestaun rua. Primeiru maka konsolida servisu PNTL atu sai forte liu tan, segundu atu institusaun PNTL sai forte tenke haree mos ba kondisoens polísia sira nian ne’ebé mak servi nasaun liu husi instituisaun ne’e rasik”, esplika Ministru Interior, Francisco Guterres, perante nia diskursu iha kuartel Komandu PNTL Munisipiu Lautem, kinta (06/02/2025).

Nia dehan, nia parte halo ona esforsu hodi aselera lalais prosesu sira hotu nunee bele fasilita PNTL sira nia servisu ba komunidade ho diak.

“Hau ejiji mos ita boot sira atu bele halao tuir regras ne’ebé iha, hakarak fo hatene ba ita hotu katak estatutu foun ne’e aprova ona sei iha pasu lubuk boot ida sei inplementa iha estatutu Ida ne’e no Komandu Jeral sira bele sosializa ba ita boot sira hotu hodi hatene no kumpri tanba ida ne’e sai hanesan hanesan matadalan ba imi hodi halao servisu iha terenu”, afirma.

Governante ne’e mos husu atu membru sira servisu ho profesional tanba ejijensia komandu ba ekipamentu apoiu servisu balu iha ona no balu ne’ebe identifika tau ona iha planu inklui prosesu tenderizasaun ba konstrusaun eskudara, postu no kazerna.

“Bainhira imi lao tuir estatutu ida ne’e mak imi sei halao imi nia servisu ho di’ak no imi sei konsegue serve nasaun ne’e liu husi instituisaun PNTL. Iha estatutu ne’e iha kestaun rua mak presiza hatene mos mak ida koalia Kona-ba disiplina katak tama iha PNTL tenke kumpri regra sira ne’ebé iha. Ida seluk koalia kona-ba oinsa imi hanesan membru PNTL tenke kompatibilidade, ida ne’e atu dehan katak hanesan membru polisia tenke servi deit ba estadu no nasaun ida ne’e”, sujere.

Ezekutivu ne’e husu atu PNTL dezvinkula an hosi kualker pratika Grupu Arte Marsiais no Arte Rituais hodi serve deit ba estadu no nasaun ida ne’e.

“Imi labele ba servi fali organizasaun seluk liu-liu ba iha arte marsiais. Fokus servi se iha tempu ruma mak investiga hetan imi sei halo pratika iha Grupu Arte Marsiais maka dalan laiha ba imi atu fila fali ba polisia tanba imi viola ona obrigasaun ne’ebe regula hela iha imi nia estatutu ne’e rasik” alerta.

“Ba Komandante sira iha ne’e, ajuda tau matan ba malu para ita servi estadu no povu rai ida ne’e ho diak, tanba povu ne’e tau hela esperansa ba ita boot sira nia kabas. Povu haree ita boot sira hanesan ezemplu ida imi tenke marka imi nia pozisaun hanesan Ema ida ne’ebe fo ezemplu ba juventude no ba povu hodi lao tuir imi nia ezemplu sira”, hakotu.

Iha biban ne’e Ministru Interior fo mos fo hanoin atraves de Komandu PNTL Munisipiu Lautem atu oinsa orienta nia membru sira servisu hamutuk ho komunidade hodi hare ba povu nia moris hakmatek. #Estev