RAEOA, 16 outubru 2023 (SRP) – Guvernu liu hosi Ministru Interiór, Francisco da Costa Guterres, Ph.D, hamutuk ho Komandante Komandu Administrasaun PNTL, Superintendente Xefi Natercia Martins no-mos tékniku aprovizionamentu Ministériu Interior nian halo vizita mai kompañia Charlie Unidade Patrullamentu Fronteira (UPF) iha Rejiaun Administrativa Espesiál Oé-Cusse Ambeno (RAEOA).
Iha vizita ne’e Governante ne’e hateten planu prioridade Governu nian, maka tenke kria kondisaun ba UPF atu nune’e sira bele iha fatin ne’ebé seguru hodi fasilita kontrolu iha fronteira tanba UPF dezenpeña papél importante lubuk ida hodi halo kontrolu ema no sasán ne’ebe tama ilegalmente mai teritóriu nasional.
Ministru ho ekipa mos sei halo levantamentu kle’an no detalladu hodi hamosu atualizasaun ba infraestruturas bázikas hirak ne’ebé iha ona no ba projetus infraestrutura hirak ne’ebé la’o hela, hodi halo reavaliasaun, korresaun no re-estruturasaun ba planu infraestruturas, nune’e bele asegura konstrusaun ho kualidade ho ninia relasaun kustu-benefísiu ne’ebé di’ak liu, no bele projeta investimentus ne’ebé presiza iha futuru, haree husi operasaun no manutensaun, hodi hatene lolós kona-ba rekursus ne’ebé iha no sustentabilidade iha futuru. # (Bui/Oscar/AX).
