Bobonaro, 23 maiu 2025 (SRP) – Kuartél Unidade Patrullamentu Fronteira (UPF) Polísia Nasionál Timor-Leste (PNTL), realiza serimónia empozisaun deviza promosaun tranzitóriu no promosaun por antiguidade iha postu administrativu Balibo, Suku Batugade.
Iha serimónia empozisaun diviza tranzitóriu no empozisaun deviza por antiguidade ba membru UPF ho totál 249. No-mós, au mezmu tempu selebra serimónia loron aniversáriu asosiasaun espoza no espozu UPF ba dala rua.
Empozisaun deviza tranzitóriu kompostu husi; inspetór xefe Polísia nain tolu (3), inspetór Polísia nain sia (9), inspetór asistente Polísia nain tolunulu-resin-ida (31), Sargentu Xefe nain ne’ennulu-resin-rua (62), Sargentu nain limanulu-resin-sia(59). Nune’e, empozisaun deviza por antiguidade, Ajente Xefe nain ne’ennulu-resin-rua (62) no Ajente Prinsipál nain ruanulu-resin-ne’en (26).
Iha Ministru Interiór (MI) Francisco da Costa Guterres nia diskursu, agradese tebes ba família hotu-hotu, no Asosiasaun Espozu no Espoza PNTL, tanba sira-nia apoiu maka membru UPF sira hala’o servisu ho di’ak.
“Lori IX governu nia naran, hakarak agradese ba família hotu tanba apoiu membru UPF hotu hodi servisu makas. Família sira hamrik metin iha kotuk, kontinua fó apoiu sira iha kualker situasaun par nune’e sira hala’o sira-nia knaar ho di’ak tebes” Tenik MI.
Governante ne’e nafatin kongratula ba família, katak susesu UPF ninian depende, sekuandu família la apoiu másimu, maka sira-nia dezempeña sei la lao ho di’ak. UPF nia servisu ne’e nobre, importante ba nasaun ida-ne’e, tanba sira defende ita-nia soberania ba ita-nia rai.
“Promosaun ne’ebé ita halo iha 27 Marsu 2025, atu rezolve problema balun, liu-liu atu onra UPF sira-nia servisu ne’ebé halo ona. UPF haluha sira-nia familia, hodi hela iha fatin ne’ebé izoladu, atu tau matan ba ita-nia fronteira, atu prevene kualker ema atu mai estraga ita-nia soberania. Tanba-ne’e estadu iha obrigasaun ida, atu onra no valoriza imi liuhusi servisu tinan naruk nia laran, hakur mota, lao iha udan laran, katak lealdade ba estadu, imi-nia sakrifisiu no badinas ba rai ida-ne’e” MI esplika.
Ezekutivu ne’e dehan promosaun ida-ne’e ninia objetivu prinsipál mak promove ona kultura ne’ebé valoriza kada membru PNTL nia servisu ba instituisaun no estadu. Sira mak sei determina sira-nia promosaun no kareira ba to’o iha leten, laos Polítiku.
Ikusliu, MI parabeniza UPF, atu sira matein nafatin, tanba tinan 2023 nia ba vizita UPF nia fatin iha fronteira, fatin susar tebes mas sira mantein servisu. Tanba -ne’e mak ohin loron, governu tau uluk prioridade ba fronteira atu rezolve UPF sira-nia problema. Espera tinan ida-ne’e, ita bele rezolve iha fronteira. Obrigadu barak ba imi-nia servsiu, tanba imi-nia nasionalízmu ne’ebé imi iha hodi serví makas rai ida-ne’e. #Rival
