Dili, 17 agostu 2023 (SRP) – Primeiru-Ministru (PM), Kay Rala Xanana Gusmão, hetan akompañamentu hosi Ministru Interior Francisco da Costa Guterres, Ph.D, hala’o vizita ba Sentru Formasaun Polisia, (CFP;sigla ingles), hodi hare progresu no dezafiu ne’ebe iha inklui rona direta Planu Estratejiku ne’ebe sai prioridade iha instituisaun PNTL.
Iha oportunidae ne’e Kay Rala Xanana Gusmão, enkoraja membru PNTL 56 ne’ebe hetan notifikasaun hosi Komandu PNTL atu servisu profisional no independente tanba iha Estadu Direitu Demokratiku, Polisia, Forsas, Instituisoens Justisa, tenke iha prinsipiu ida atu servi deit povu no rai ida ne’e.
“Polisia no forsa iha instituisoens estadu demokratiku ida ne’e, labele sadere ba partidu ida, ema ida idak nudar sidadaun bele iha nia eskolla no fiar ida ne’e, liliu PNTL no forsa labele tama iha politika”, hateten PM Xanana, perante nia diskursu, iha Sentru Formasaun Polisia Comoro, Kuarta, (17/08/2023).
Nia dehan, iha estadu demokratiku ida ne’e, povu mak iha desizaun ultima no povu mak hili no determina, povu mak fó fiar hodi ukun, wainhira ukun sala desidi sai, ida ne’e mak hanaran estadu demokratiku.
“Ita presiza dunik, fó sai ba publiku hodi hatene, se kuandu ita halo deit iha laran ne’eba mak povu sei deskonfia ita hotu. Hapara buat sira ne’ebé ladiak hodi halo povu labele hanoin barak”, salienta.
Xefi Governu Konstitusional da IX ne’e triste tebes wainhira rona katak, iha membru PNTL balun livremente a favor ba iha partidu politiku balun.
“Ida ne’e ladiak! tanba se hanesan ne’e sidadaun ida tenke independente nia iha atitude nu’udar membru polisia labele partense ba iha Partidu A ka Paridu B no labele halo polítika. Imi nia misaun mak atu proteje nasaun ida ne’e, tanba ida ne’e mak povu atu fó fiar ba ajente polisia no militares sira. Imi tenke hatudu ba públiku katak sakrifisiu ne’ebé povu sira halo hodi ohin loron bele hetan ajente iha polisia ida ne’e maka misaun hodi servi no proteje”, fundamenta.
“Mai iha ne’e laos mós atu hamoe imi, maibé mai iha ne’e atu hamutuk fó konfiansa ba povu bele fiar fali sira. Ita la julga malu, hau sei la husu kona-ba ida ida nia hakarak ou obrigasaun husi ema ruma hodi tama iha partidu. Maibé, nu’udar Primeiru Ministru, ha’u husu mós responsabilidade ba komandantes superior sira, ha’u sei tau matan no haree hahalok sira atu lori polisia ba servi no proteje povu, se kuandu la proteje didiak mak sei xamada atensaun katak, la merese atu servisu iha polisia” afirma Primeiru-Ministru ne’e.
Governante ne’e enkoraja membru PNTL sira hahú ohin ba oin taka tiha pajina foer horseik ninian, loke fali pajina foun ba aban bainrua nian, tanba membru polisia hotu kompremetidu ho missaun ida, la halo politika no la partense ba partidu ida maibe serve deit povu no rai ida ne’e hodi kontribui ba paz no dezenvolvimentu.
Entertantu vizita ne’e, PM Xanana hetan akompañamentu hosi Vise Primeiru-Ministru, Ministru Koordenador ba Asuntu Sosiais no Ministru Dezenvolvimentu Rural no Habitasaun Komunitária, Mariano Assanami Sabino, Ministru Defeza, Donaciano do Rosário Gomes, Ministru Asuntus Kombatentes Libertasaun Nasionál, Gil da Costa Monteiro, Ministru Juventude Desportu, Nelio Isac Sarmento, Sekretáriu Estadu Teras no Propriedade, Jaime Xavier Lopes, Sekretariu Estadu Protesaun Sivil, Domingos Mariano Reis, Komandante Jerál PNTL, Komissáriu Jeral Henrique da Costa, Segundu Komandante Jerál PNTL, Komisariu Pedro Belo, reprezentante TLPDP, asesor nasionais no sosiedade sivil sira.#
Autor : Abuy
Editor : Fatinha
Fotos : AX
