Dili, 5 juñu 2024 (SRP) – Komandu PNTL liu hosi Unidade Espesiál Polísia (UEP), halo operasaun lao ain iha tempu kalan hodi garante seguransa ba komunidade sira iha Kapitál Dili ne’ebé halo movimentu nune’e la fó espasu ba ema hamosu problema iha tempu kalan.
Komandante UEP Superitendente Polísia Damião Correia, hateten operasaun movel ne’e nia objetivu maka atu mantein orden Públika no asegura seguransa ba Komunidade sira liu-liu antesipa krime ne’ebé akontese iha Dili laran.
“Ita atribui tarefas ba Komandante Operasaun hodi halo atividade patrulla lao ain tama sai Suku, Aldeia no Bairru iha tempu kalan, hodi halo esforsu tomak garante situasaun hakmatek ba komunidade hotu iha sidade Dili, liu-liu ba sira ne’ebé perturba orden públika”, esplika Damião, iha area Caicoli.
Nia dehan, atu prevene konflitu no responde ba asaun kriminál ka hamosu situasaun negativu PNTL sei responde persuasivu no represivu hodi mantein situasan hakmatek atu labele mosu sitausaun negativu.
“Tuir orientasaun Komandante Jerál PNTL nian ita prepara rekursu hodi halo patrullamentu lao ain tama-sai bairru, iha área sira ne’ebé determina ona iha Dili laran liu-liu fatin ne’ebé konsidera hanesan área risku ba konflitu”, subliña.
Iha operasaun ne’e ekipa konjunta hetan informasaun hosi komunidade katak iha joven balu iha area Caicoli (CCD nia sorin) joven sira konsumu alkohol iha estrada públiku, nune’e wainhira ekipa to’o iha fatin refere hapara kedas no haruka sira labele repete tan.
Enkuantu durante halo operasaun movel iha Kapitál Dili, membru UEP sira halo pasa revista ba viaturas hirak ne’ebé deskunfia rai sasán kroat no-mós motorista sira ne’ebé la kompleta asesores viaturas nian. #SRP
