Díli, 03 juñu 2024 (SRP) – Diresaun Jerál Servisu Migrasaun (DGSM), ohin realiza Segundu Enkontru Kooperasaun Grupu Traballu Imigrasaun (ICWG:sigla ingles), entre Guvernu Timor-Leste no Guvernu Austrália, hodi haforsa jestaun fronteira ida ne’ebé di’ak iha postu fronterisa territóriu nasionál tomak.
“Hau lori Guvernu Nia naran hakarak agradese ba Embaixadór Australia ba apoiu hodi organiza enkontru grupu traballu importante ida-ne’e hamutuk ho ami-nia servisu migrasaun. Sorumutu ida-ne’e signifikadu tebes atu hametin ita-nia parseria iha área servisu imigrasaun no asuntu rejionál sira ne’ebé iha relasaun hodi haforsa jestaun fronteira”, dehan Francisco Guterres, iha Salaun Nobre, Ministériu Negosiu Estranjeiru no Kooperasaun, Avenida Portugal, segunda (03/06/2024).
Tuir nia, Austrália no Timor-Leste laos deit nasaun viziñu no belun ne’ebé besik maibé Austrália mós nu’udar parseiru dezenvolvimentu no seguransa boot liu iha Timor-Leste.
“Ne’e mak realidade ne’ebé fó inspirasaun mai ita atu servisu hamutuk ho orientasaun estratéjiku tuir objetivu komún ida-ne’ebé Iha ona. Ha’u fiar katak ho asistensia hosi Austrália kontribui ona buat lubuk ida ba nasaun ne’e nia reziliente, prosperu no seguru, hodi apoia povu Timor-Leste atu halakon kiak no atinje kreximentu ekonómiku sustentavel. Ida-ne’e konsistente ho ita-nia Planu Estratejiku Dezenvolvimentu (PED) Timor-Leste nian 2011-2030 no-mos Objetivu Dezenvolvimentu Sustentavel (ODS)”, esplika Francisco.
Governante ne’e hatutan, liu hosi enkontru ida-ne’e mós atu kontinua hametin parseria iha área seguransa inklui servisu migrasaun hodi kombate krime husi autór rede krime organizadu sira.
“Ita-nia enkontru ohin nu’udar momentu ida-ne’ebé di’ak tebes atu fahe ita-nia hanoin kona-ba prioridade nasionál no tendénsia rejionál sira husi ita-nia nasaun ida-idak. Ita sei diskute no halo revizaun kona-ba tendénsia rejionál no asuntu seguransa fronteira ne’ebé afeta ita-nia objetivu seguransa rejionál no hein katak ita-nia enkontru remata sei iha prioridade sira atu hatán ba ita-nia objetivu imediatu no ba longu prazu”,
“Agora ha’u hanoin kona fali iha loron 24 fulan-marsu, ha’u asina ona MoU foun ho Polísia Federál Austrália (le;AFP) liu hosi TLPDP ho objetivu atu bele ajuda Guvernu Timor-Leste servisu makas hodi kombate krime transnasionál hotu”, tenik tan.
Iha fatin hanesan Embaixadora Austrália iha Timor-Leste, Caitlin Wilson, hateten sorumutu daruak nian ne’e bele sai pasu importante hodi haree ba interese kolektivu atu promove kooperasaun ne’ebé diak hodi melhora kapasidade servisu haforsa diak liután servisu iha Timor-Leste.
“Iha ne’e husi ami parte hakarak halo deit sumáriu ba área importante sira ne’ebé iha liu-liu kona-ba kooperasaun iha area seguransa nian. Entaun sorumutu daruak ne’e atu kontinua promove área jestaun fronteira nian nomós deskute área importante seluk kona-ba seguransa fronteira nian iha rejiaun ida-ne’ebé sai interese komún nakait ba jestaun imigrasaun no fronteira nian”, esplika Embaixadora Caitlin Wilson.
Nia dehan, agora dadaun sei deskute kona-ba elementu prátika balun husi kooperasaun ne’e nian ne’ebé sei foka liu iha área kapasitasaun no informasaun inklui área balun ne’ebé sei explora wainhira remata enkontru ne’e.
Diplomata Austrália ne’e fundamenta, nia parte sei kontinua koalia kona-ba oinsá hametin koordenasaun servisu liu-liu programa kooperasaun bilaterál ne’ebé mak sei ajuda seguransa rejionál liuhosi kontrolu fronteira ne’ebé mak durante ne’e estabelese ona entre nasaun rua Austrália no Timor-Leste.
Partisipa iha enkontru ne’e envolve, Diretór Jerál Servisu Migrasaun, Inspetora Xefi Polísia Adelaide da Rosa, Xefi Sektór sira, Konsuladu Jerál, Adidu no-mós ajente konsuladu sira ne’ebe halo misaun diplomata iha diáspora. Enkuantu membru grupu traballu hosi Austrália nian maka Deputy Head of Mission, Australian Embassy. Ms. Suzy Wilson-Uilelea, First Secretary (ABF) Ms Fiona Douglas (ABF, Jakarta), First Secretary Mr. Paul Young (Home Affairs, Dili), Mr. Alex Basoski (Home Affairs International Division, Canberra), Home Affairs Officer, Mr. Sertorio Barros no-mós Home Affairs Officer, Ms. Maria da Silva. #SRP
