Liquiça, 10 Abril 2026,SERPM-Serimónia Inagurasaun Postu Polisia Kaitehu no Nasuta iha Postu Administrativu Bazartete, Munisipiu Liquiça.
Iha breves palavras, Ministru Interior, Francisco da Costa Guterres, Ph.D, agradese ba emprezáriu no inan aman sira nia apoiu ba prosesu harii postu Polisia ne’e.
“Postu polisia ida ne’e, reprezenta dunik filózofia polisia nian, katak polisia servisu hamutuk ho komunidade. Tanba Seguransa ne’e iha ita hotu hotu nia liman ne’ebé reflete tebes objetivu Polisia Komunitária ba PNTL nian, tanba polisia iha ne’ebé deit, tenki halibur komunidade servisu hamutuk hodi servi estabilidade no dezenvolvimentu iha komunidade nia leet”, dehan MI (10/04/2026)
Governante ne’e, apresia eis Komandante Munisípiu Liquiça, atuál Komandante Munisípiu Laútem Superintendente Xefi Calisto Gonzaga nia servisu ne’ebé di’ak, inisiativa ho Komunidade no emprezáriu sira halo servisu hamutuk harii Postu Polisia ida ne’e. Ida ne’e sai hanesan ezemplu di’ak ba Polisia sira seluk.
Enkuantu MI husu ba jovem Munisípiu Liquiça sira atu kolabora ho PNTL hodi hametin pas no estabilidade iha rai ida ne’e.
MI mós agradese ba emprezáriu sira ne’ebé mak apoiu PNTL hodi harri Postu Polisia ne’e, sai hanesan exemplu di’ak ida hodi hametin kooperasaun diak liutan iha rai ida ne’e.
Introduz mós katak, Postu Polisia Kaitehu nian ne’e, hetan apoiu masimu husi Emprezáriu no Komunidade Kaitehu servisu hamutuk ho PNTL sira to’o Postu ne’e remata.
Iha Serimonia inagurasaun Postu Polisia Kaitehu no Nasuta no aumesmu tempu hala’o mós serimónia, agradesimentu no reflesaun ba aniversariu PNTL ba dala XXVI, neebe hetan mos partisipasaun husi membru IX Governu Konstituisionál, deputadu sira hosi Parlamentu Nasionál, Komandante Jerál PNTL, Komisáriu Assistente Polisia, Afonso dos Santos, Segundu Komandante Jerál PNTL, Komisaria Assistente, Polisia Eufrasia Soares Martins, Komandante PNTL Munisípiu Liquica, Prezidente Autoridade Munisipiu Liquiça, reprezentante TLPDP, Veteranus no Komunidade Munisipiu Liquiça. #Buy
